Jayeshbhai Jordaar: అమ్మాయి తండ్రిగా రణ్‌వీర్‌

రణ్‌వీర్‌సింగ్‌, షాలినీ పాండే జంటగా నటిస్తున్న చిత్రం ‘జయేశ్‌భాయ్‌ జోర్దార్‌’. బొమన్‌ ఇరానీ, రత్నపథక్‌ షా, జియా వైద్య తదితరులు ప్రధాన పాత్రల్లో నటిస్తున్నారు. దివ్యాంగ్‌ థక్కర్‌ దర్శకత్వం వహించారు. మనీష్‌ శర్మ నిర్మాతగా  వ్యవహరిస్తున్నారు. మే 13న విడుదల కానున్న ఈ సినిమా ట్రైలర్‌ తాజాగా విడుదలైంది. కథ ఏ అంశం మీద ఉంటుందో ట్రైలర్‌లోనే చూపించే ప్రయత్నం చేశారు. రణ్‌వీర్‌సింగ్‌, షాలినీ పాండే దంపతులకు అప్పటికే అమ్మాయి ఉంటుంది. కోడలు రెండో సారి గర్భం దాల్చినపుడు మళ్లీ అమ్మాయే అని తెలియడంతో రణ్‌వీర్‌ తండ్రి, ఊరి సర్పంచి అయిన బొమన్‌ ఇరానీ కోడలికి గర్భం తీయించేయాలని ప్రయత్నిస్తాడు. దీంతో ఇంటి నుంచి పారిపోయిన రణ్‌వీర్‌ కుటుంబం వీరి నుంచి తప్పించుకుందా? చివరికి ఆ ఇంటి పెద్ద మనసు మారిందా? లేదా? అన్నది తెరమీదే చూడాలి. ఉత్తరాదిలోని మారుమూల గ్రామాల్లో ఆడపిల్లల సామాజిక స్థితినే నేపథ్యంగా తీసుకుని దర్శకుడు ఈ చిత్రాన్ని తెరకెక్కించారు. ఓ పాపకు తండ్రిగా, భర్తగా, తన తండ్రికి భయపడే కొడుకుగా రణ్‌వీర్‌ నటించిన తీరు సినిమాను మరో మెట్టు ఎక్కిస్తుందని చిత్రబృందం తెలిపింది.