Kajal Aggarwal: నటి కాజల్‌ కొడుకు పేరేంటో తెలుసా?

ముంబయి: ప్రముఖ సినీతార కాజల్‌ అగర్వాల్‌ పండంటి మగ బిడ్డకు నిన్న జన్మనిచ్చిన విషయం తెలిసిందే. ఈ వార్త మంగళవారం సామాజిక మాధ్యమాల్లో చక్కర్లు కొట్టగా.. అనేకమంది అభిమానులు, సినీ ప్రముఖులు అందాల చందమామకు శుభాకాంక్షలు చెప్పారు. అయితే, పుట్టిన బాబుకు ఈ దంపతులు ఏం పేరు పెడతారోనన్న ఆసక్తి అభిమానుల్లో మొదలైంది. ఈ నేపథ్యంలో కాజల్‌ భర్త, పారిశ్రామికవేత్త గౌతమ్‌ కిచ్లూ తమకు మగబిడ్డ పుట్టాడనీ.. నీల్‌ కిచ్లూ అని పేరు పెట్టినట్టు బుధవారం ఇన్‌స్టాలో అధికారికంగా వెల్లడించారు. తమ పట్ల ప్రేమ చూపించి ఆశీర్వదించిన అందరికీ ఈ సందర్భంగా కృతజ్ఞతలు తెలుపుతున్నట్టు పేర్కొన్నారు.

టాలీవుడ్‌లో అగ్రస్థాయి హీరోలతో నటించిన కాజల్‌ స్టార్‌ హీరోయిన్‌గా రాణించారు. ఈ క్రమంలోనే తన చిన్ననాటి స్నేహితుడు, వ్యాపారవేత్త గౌతమ్‌తో ఆమె ప్రేమలో పడ్డారు. కొన్నేళ్లపాటు ప్రేమలో ఉన్న ఈ జంట.. పెద్దల అంగీకారంతో 2020 అక్టోబర్‌లో వివాహ బంధంలోకి అడుగుపెట్టారు. వివాహం తర్వాతా ఆమె నటిస్తూ ప్రేక్షకులను అలరిస్తున్నారు. చిరంజీవి సరసన ఆమె నటించిన ‘ఆచార్య’ ఈ నెల 29న ప్రేక్షకుల ముందుకు రానుంది.