Yashoda: ఆ రుగ్మత నాక్కూడా ఉంది.. యశోద సక్సెస్‌ మీట్‌లో నటి

హైదరాబాద్‌: ‘సీతమ్మ వాకిట్లో సిరిమల్లె చెట్టు’, ‘పడి పడి లేచే మనసు’ వంటి చిత్రాల్లో సహాయనటిగా మంచి  గుర్తింపు తెచ్చుకున్న నటి కల్పిక గణేష్‌(Kalpika Ganesh). తాజాగా సమంత ప్రధాన పాత్రలో తెరకెక్కిన యశోద(Yashoda)లో కనిపించి ప్రేక్షకులను అలరించింది. ఇటీవల ఈ సినిమా సక్సెస్‌ మీట్‌కు హాజరైన కల్పిక.. సమంతను గుర్తుచేసుకున్నారు.

‘‘యశోద విజయం సాధించడం ఆనందంగా ఉంది. ఈ సక్సెస్‌మీట్‌లో సమంతను చాలా మిస్‌ అవుతున్నాం. మాతో ఆమె వస్తుందని చెప్పారు. అందుకే నేను ఆస్పత్రిలో అపాయింట్‌మెంట్‌ కూడా క్యాన్సిల్‌ చేసుకుని వచ్చాను. నేను 13 సంవత్సరాలుగా స్పాండిలైటిస్‌తో బాధపడుతున్నాను. సమంతకు ఉన్న మయోసైటిస్‌ రుగ్మత నాక్కూడా  ఉంది.  కాకపోతే నేను మొదటి స్టేజ్‌లో ఉన్నా.. సమంత మూడో స్టేజ్‌లో ఉంది. నేను ఒకసారి సమంతను కలిసి ఆమెతో ఈ విషయం గురించి మాట్లాడాలని అనుకుంటున్నా. ఆమె త్వరగా కోలుకోవాలి’ అని కల్పిక అన్నారు.