Vikram: ‘విక్రమ్‌’ బాక్సాఫీస్‌ వేట.. రూ.150 కోట్లు ఆ రాష్ట్రం నుంచే‌..!

చెన్నై: చాలా సంవత్సరాల తర్వాత అగ్ర కథానాయకుడు కమల్‌హాసన్‌ కెరీర్‌లోనే బిగ్గెస్ట్‌ బ్లాక్‌బస్టర్‌గా నిలిచిన చిత్రం ‘విక్రమ్‌’. గ్యాంగ్‌స్టర్‌ నేపథ్యంతో తెరకెక్కిన ఈ సినిమాలో కమల్‌తోపాటు విజయ్‌ సేతుపతి, ఫహద్‌ ఫాజిల్‌ కీలకపాత్రలు పోషించారు. ఇక, అతిథి పాత్రలో కనిపించిన సూర్య ‘రోలెక్స్‌’గా అదరగొట్టేశారు. ఇంతమంది హీరోలు ఒకే స్క్రీన్‌పై మెరుపులు మెరిపించడంతో.. ఈ సినిమా బాక్సాఫీస్‌ వద్ద కాసుల వర్షం కురిపిస్తోంది. విడుదలైన 16 రోజుల్లోనే ప్రపంచవ్యాప్తంగా రూ.300 కోట్లు వసూళ్లు రాబట్టిందని సినీ విశ్లేషకుల అంచనా. ఈ మొత్తం కలెక్షన్స్‌లో సగం అంటే రూ.150 కోట్లు కేవలం తమిళనాడు నుంచే వచ్చాయట. దీంతో ఇప్పటివరకూ ఆ రాష్ట్రంలో ఉన్న ‘బాహుబలి-2’ కలెక్షన్స్‌ రికార్డుని ‘విక్రమ్‌’ బద్దలు కొట్టింది. రానున్న రోజుల్లో ఈ సినిమా మరిన్ని రికార్డులు సృష్టించే దిశగా దూసుకెళ్తోంది.

అసలు ఈ సినిమా కథేంటంటే:

‘విక్రమ్‌’... పవర్‌ఫుల్‌ యాక్షన్‌ ఎంటర్‌టైనర్‌. గ్యాంగ్‌స్టర్‌, ఆయన్ని పట్టుకునేందుకు రంగంలోకి దిగిన పోలీస్‌ బృందానికి మధ్య జరిగే పోరు ఇది. ఇందులో కమల్‌హాసన్‌.. కర్ణన్‌ అనే పాత్రలో నటించారు. భారీగా మాదకద్రవ్యాలను పట్టుకున్న పోలీస్‌ అధికారి ప్రభంజన్‌, ఆయన తండ్రి కర్ణన్‌ (కమల్‌హాసన్‌)ను ఓ ముఠా చంపేస్తుంది. ఈ డ్రగ్స్‌ దందాను నిలువరించి, హత్యలకు పాల్పడుతున్న ఆ ముఠాను పట్టుకునేందుకు అమర్‌(ఫహద్‌ ఫాజిల్‌) అనే స్పై ఏజెంట్‌, అండర్‌ కవర్‌ ఆఫీసర్‌ రంగంలోకి దిగుతాడు. కేసు దర్యాప్తు చేస్తోన్న సమయంలో ఈ డ్రగ్స్‌ మాఫియా వెనుక సంతానం (విజయ్‌ సేతుపతి) హస్తం ఉన్నట్లు గుర్తిస్తాడు. అంతేకాకుండా కర్ణన్‌ బతికే ఉన్నట్లు తెలుసుకుంటాడు. అసలు కర్ణన్‌ ఎవరు? చనిపోయినట్లు ఎందుకు బయటప్రపంచాన్ని నమ్మించాడు? అమర్‌ ఈ కేసును ఎలా చేధించాడు? రోలెక్స్‌ (సూర్య) పాత్ర ఏమిటి?.. ఇలాంటి ఎన్నో ఆసక్తికర అంశాలతో లోకేశ్‌ ఈ చిత్రాన్ని తెరకెక్కించారు. అనిరుధ్‌ స్వరాలు సమకూర్చారు.