Indian 2: భారతీయుడు కోసం అంతర్జాతీయ యాక్షన్‌ కొరియోగ్రాఫర్లు

‘విక్రమ్‌’ (Vikram) విజయం తర్వాత మరింత జోరుగా సినిమాల్ని పూర్తి చేస్తున్నారు కమల్‌హాసన్‌ (Kamal Haasan). ప్రస్తుతం ఆయన దృష్టంతా ‘భారతీయుడు 2’ (Indian 2)పైనే ఉంది. ప్రముఖ దర్శకుడు శంకర్‌ ఈ చిత్రాన్ని శరవేగంగా పూర్తి చేసే ఉన్నారు. పలు కారణాలతో ఇప్పటికే ఆలస్యమైన ఈ సినిమాని ఎలాంటి అవాంతరాలు లేకుండా త్వరగా చిత్రీకరణ పూర్తి చేసి ప్రేక్షకుల ముందుకు తీసుకురావాలనుకుంటున్నారు. కొన్ని రోజులుగా ఈ సినిమా చిత్రీకరణ చెన్నైలో జరుగుతోంది. తాజాగా ఈ సినిమాలోని కీలక యాక్షన్‌ ఘటాల్ని తెరకెక్కిస్తున్నారట. దీని కోసం అంతర్జాతీయ స్థాయి యాక్షన్‌ కొరియోగ్రాఫర్లు పనిచేస్తున్నట్లు తెలుస్తోంది. దీనికి సంబంధించిన ఫొటో ఒకటి సోషల్‌ మీడియాలో సందడి చేస్తోంది. ఎక్కువ రోజుల పాటు సాగే ఈ షెడ్యూల్‌లో ఇటీవలే కాజల్‌ కూడా పాల్గొంది. ఈ చిత్రంలో రకుల్‌ప్రీత్‌సింగ్‌ కూడా నటిస్తోంది. సముద్రఖని, బాబీ సింహా, ప్రియ భవానీ శంకర్‌, వెన్నెల కిషోర్‌ తదితరులు ఇతర పాత్రల్లో నటిస్తున్న ఈ చిత్రానికి అనిరుధ్‌ రవిచంద్రన్‌ స్వరాలు అందిస్తున్నారు.