Vikram: ఫిబ్రవరిలో ముగింపు

కథానాయకుడు కమల్‌హాసన్‌, దర్శకుడు లోకేష్‌ కనగరాజ్‌ కలయికలో రూపొందుతోన్న యాక్షన్‌ ఎంటర్‌టైనర్‌ ‘విక్రమ్‌’. ఈ సినిమాని ఆర్‌.మహేంద్రన్‌తో కలిసి కమల్‌ స్వయంగా నిర్మిస్తున్నారు. విజయ్‌ సేతుపతి, ఫహాద్‌ ఫాజిల్‌ కీలక పాత్రలు పోషిస్తున్నారు. ప్రస్తుతం తుది దశ చిత్రీకరణలో ఉంది. ఈ చిత్రానికి సంబంధించిన ఆసక్తికర విషయాలను దర్శకుడు లోకేష్‌ జాతీయ మీడియాతో పంచుకున్నారు. ‘‘సినిమా ప్రస్తుతం ముగింపు దశలో ఉంది. ఆఖరి షెడ్యూల్‌ను శరవేగంగా చిత్రీకరిస్తున్నాం. ఫిబ్రవరి మధ్య నాటికి చిత్రీకరణ మొత్తం పూర్తి చేస్తాం’’ అని ఆయన తెలిపారు. అయితే చిత్ర విడుదల తేదీపై ఏ స్పష్టత ఇవ్వలేదు. విభిన్నమైన యాక్షన్‌ థ్రిల్లర్‌ కథాంశంతో రూపొందుతోన్న చిత్రమిది. కమల్‌, విజయ్‌, ఫహాద్‌ సరికొత్త లుక్‌లలో కనిపించనున్నారు. ఈ సినిమా మార్చిలో ప్రేక్షకుల ముందుకు రానున్నట్లు ప్రచారం వినిపిస్తోంది. ఈ చిత్రానికి సంగీతం: అనిరుధ్‌, ఛాయాగ్రహణం: గిరీష్‌ గంగాధరన్‌.