Kangana Ranaut: మీ ముందుకు ‘సీత’గా వస్తున్నా!

ముంబయి: ‘‘సీత: ది ఇంకార్నేషన్‌’’ చిత్రంలో సీత పాత్రలో ఎవరు నటించనున్నారనే సందేహం తొలిగిపోయింది. ఇటీవలే విడుదలైన ‘‘తలైవి’లో దివంగత తమిళనాడు ముఖ్యమంత్రి జయలలిత జీవితగాథ పాత్రలో నటించి మెప్పించిన కంగనారనౌత్ తాజాగా తన తదుపరి చిత్రం గురించి ఇన్‌స్టాగ్రామ్‌ వేదికగా ప్రకటించారు. ‘‘సీత: ది ఇంకార్నేషన్‌’’ చిత్రంలో సీత పాత్రలో కనిపించబోతున్నాను అని తెలిపింది. ప్రముఖ సినీ రచయిత కెవీ విజయేంద్ర ప్రసాద్‌ కథ, స్క్రీన్‌ ప్లే అందిస్తున్న ఈ చిత్రానికి, అలౌకిక్‌ దేశాయి దర్శకత్వం వహిస్తున్నారు. ఏ హ్యూమన్‌ బీయింగ్‌ స్టూడియో ప్రొడక్షన్స్ పతాకంపై ‘సీత’ చిత్రాన్ని నిర్మిస్తున్నారు. మనోజ్‌ ముంతాషీర్‌ సాహిత్య, సంభాషణలు సమకూరుస్తున్నారు. 

అయితే గతంలో ఈ చిత్రంలో కరీనా కపూర్‌ నటించనుందని వార్తలు వచ్చాయి. అయితే తానే నటిస్తున్నట్లు కంగనా చెప్పడంతో సందేహాలు తొలగిపోయాయి. హిందీ, తెలుగు, తమిళ, మలయాళం, కన్నడ భాషల్లో ఈ చిత్రం రూపొందుతోంది. ఈ సందర్భంగా ఇన్‌స్టాలో కంగనా పోస్టు చేశారు. ‘అత్యంత ప్రతిభావంతులైన ఆర్టిస్టుల బృందంతో కలిసి పనిచేయబోతున్నారు. సీతారాముల ఆశీర్వాదంతో మీ ముందుకు వస్తున్నా’ అంటూ కంగనా తెలిపారు.