Bollywood films: ప్రస్తుతం ఆమె ఒంటి చేత్తో బాలీవుడ్‌ను కాపాడుతోంది..: కంగనా రనౌత్‌

హైదరాబాద్‌: బాలీవుడ్‌ జనాలు ఫైర్‌ బ్రాండ్‌గా పిలుచుకునే హీరోయిన్‌ కంగనారనౌత్‌ (Kangana Ranaut). ఎలాంటి విషయాల గురించైనా తనదైన శైలిలో స్పందిస్తూ ఎప్పుడూ వార్తల్లో నిలుస్తుంటుంది. తాజాగా మరోసారి బాలీవుడ్ సినిమాలపై కొన్ని వ్యాఖ్యలు చేసింది. సీనియర్‌ హీరోయిన్‌ టబు(Tabu) పై ప్రశంసల వర్షం కురిపించింది. ప్రస్తుతం బాలీవుడ్‌ చిత్రాలను టబు బతికిస్తోందని తెలిపింది.

‘‘ఈ ఏడాది రెండు హిందీ సినిమాలు మాత్రమే మంచి ప్రేక్షకాదరణ పొందాయి. అవి భూల్‌ భూలయ్యా2 (Bhool-Bhulaiyaa 2), దృశ్యం2 (Drishyam 2). ఈ రెండు చిత్రాల్లో సూపర్‌ స్టార్‌ టబు ప్రధాన పాత్రలో నటించారు. ఆమె 50 ఏళ్ల వయసులో ఒంటి చేత్తో హిందీ చిత్ర పరిశ్రమను కాపాడుతోంది. తన అద్భుతమైన ప్రతిభతో వయసుతో సంబంధం లేకుండా స్టార్‌గా నిలవడం నిజంగా అభినందనీయం. మహిళలు వాళ్లు చేసే పనిపై విశ్వాసంతో ఉంటారు. అలాంటి వారు ఇంకా ఎక్కువ ప్రశంసలు పొందడానికి అర్హులు. టబు ఎంతోమందిలో స్ఫూర్తి నింపుతోంది’’ అని కంగనా తన ఇన్‌స్టా స్టోరీలో పొగడ్తలు కురింపించింది.

ప్రస్తుతం కంగనా లేడీ ఓరియంటెడ్‌ చిత్రాలతో బిజీగా ఉంది. ‘ఎమర్జెన్సీ’ చిత్రంలో నటిస్తోంది. ఇందిరా గాంధీ హయాంలో జరిగిన పరిణామాల ఆధారంగా ఈ సినిమా తెరకెక్కనుంది. ఈ చిత్రంలో ఆమె ‘ఇందిరా గాంధీ’ పాత్రలో నటిస్తోంది. ఈ సినిమాకు దర్శకత్వం వహించడంతో పాటు నిర్మాతగానూ వ్యవహరిస్తోంది.