Kangana Ranaut: ఆ ఫీల్‌ నుంచి బయటకు రావడానికి వారం పట్టొచ్చు: కంగనా రనౌత్‌

ముంబయి: రిషబ్‌ శెట్టి (Rishab Shetty) స్వీయ దర్శకత్వంలో వచ్చిన ‘కాంతార’పై (Kantara) బాలీవుడ్‌ నటి కంగనా రనౌత్‌ (Kangana Ranaut) ప్రశంసల వర్షం కురిపించారు. తాజాగా ఈ చిత్రాన్ని వీక్షించిన ఆమె సోషల్‌మీడియా వేదికగా తన అనుభవాన్ని పంచుకుంటూ ఓ స్పెషల్‌ వీడియో షేర్‌ చేశారు. సినిమా అంటే ఎలా ఉండాలో ఈ చిత్రం తెలియజేసిందన్నారు.

‘‘కుటుంబసభ్యులతో కలిసి ఇప్పుడే ‘కాంతార’ చూశా. ఇప్పటికీ నా శరీరం వణుకుతూనే ఉంది. ఇదొక అద్భుతమైన అనుభవం. సాంప్రదాయం, జానపద కథలు, దేశీయ సమస్యల సమ్మేళనమే ఈ చిత్రం. రిషబ్‌ శెట్టికి హ్యాట్సాఫ్‌. రచన, దర్శకత్వం, నటన.. అన్నీ మరోస్థాయిలో ఉన్నాయి. ప్రకృతి అందాలను చూపించిన విధానం, యాక్షన్‌ సన్నివేశాలను తెరకెక్కించిన తీరు అత్యద్భుతంగా ఉంది. సినిమా అంటే ఇది. ఇలాంటి చిత్రాన్ని తాము ఎప్పుడూ చూడలేదని థియేటర్‌లో ప్రేక్షకులు చెబుతున్నారు. ఇలాంటి అద్భుతమైన చిత్రాన్ని అందించిన టీమ్‌కు ధన్యవాదాలు. మరోవారం రోజులపాటు నేను ఈ అనుభూతిలోనే ఉంటాననిపిస్తుంది’’  అని కంగన పేర్కొన్నారు.