Kangana Ranaut: లైంగిక వేధింపులకు గురయ్యా: కంగనా రనౌత్‌

ముంబయ: చిన్నతనంలోనే తాను కూడా లైంగిక వేధింపులకు గురయ్యానంటూ నటి కంగనా రనౌత్‌ వెల్లడించారు. నటిగానే కాకుండా వ్యాఖ్యాతగానూ కంగన ప్రేక్షకుల్ని అలరిస్తోన్న సంగతి తెలిసిందే. ‘లాక్‌ అప్‌’ అనే రియాల్టీ షో కోసం ఆమె మొదటిసారి యాంకర్‌గా వ్యవహరిస్తున్నారు. తాజాగా జరిగిన ఎపిసోడ్‌లో మునావర్‌ అనే కంటెస్టెంట్‌.. చిన్నతనంలోనే తాను బంధువుల నుంచి లైంగిక వేధింపులు ఎదుర్కొన్నానని, కుటుంబ సభ్యులకు ఈ విషయం తెలిస్తే ఏమవుతుందోననే భయంతో ఇప్పటి వరకూ ఎవ్వరికీ చెప్పలేదని, బంధువుల వల్ల నాలుగేళ్లు నరకం చూశానని చెప్పి భావోద్వేగానికి గురయ్యాడు. ఇలాంటి చేదు సంఘటనను ఎలాంటి బెరుకు లేకుండా పబ్లిక్‌ ప్లాట్‌ఫామ్‌పై ధైర్యంగా పంచుకోవడంతో మునావర్‌పై కంగన ప్రశంసల వర్షం కురిపించారు. అనంతరం తాను ఎదుర్కొన్న ఇబ్బందులను ఆమె పంచుకున్నారు.

‘‘సమాజంలో చాలామంది చిన్నారులు లైంగిక వేధింపులు ఎదుర్కొంటున్నారు. పిల్లల పెంపకం విషయంలో ఎంత జాగ్రత్తగా ఉన్నప్పటికీ ఇలాంటి సంఘటనలు జరుగుతూనే ఉన్నాయి. నేను కూడా నా చిన్నప్పుడు లైంగిక వేధింపులకు గురయ్యాను. నాకు ఆరేళ్ల వయసు ఉన్నప్పుడు.. మా గ్రామంలో నివసించే ఓ అబ్బాయి మాతో ఇబ్బందికరంగా ప్రవర్తించేవాడు. ఆ అబ్బాయి మా కంటే నాలుగేళ్లు మాత్రమే పెద్దవాడు. మా స్నేహితులందరం కలిసి ఆటలాడుకునే సమయంలో అతను మా వద్దకు వచ్చి.. మమ్మల్ని అసభ్యకరంగా తాకేవాడు. లైంగిక వేధింపులకు గురవుతున్నామని ఆ వయసులో మాకు తెలియలేదు’’ అని కంగన చెప్పారు.