Sita Ramam: ఆమెలా మరెవరూ నటించలేరు: కంగనా రనౌత్‌

ఇంటర్నెట్‌ డెస్క్‌: అందమైన ప్రేమకథగా ప్రేక్షకుల ముందుకు వచ్చి అఖండ విజయాన్ని అందుకున్న సినిమా ‘సీతారామం’. ఈ చిత్రంపై సినీ విమర్శకులు సైతం ప్రశంసలు కురిపించారు. సీత పాత్రలో మృణాల్‌ ఠాకూర్‌, రామ్‌గా దుల్కర్‌ సల్మాన్‌ అద్భుతమైన నటనతో ప్రేక్షకుల మనసులు దోచేశారు. తాజాగా ఈ సినిమాపై కంగనా రనౌత్‌ స్పందించారు. ఈ చిత్రంలోని పాత్రధారులు చాలా బాగా నటించారని ప్రశంసించారు. ‘జిందాబాద్‌ ఠాకూర్ సాబ్‌’ అంటూ మృణాల్‌ నటనను ప్రత్యేకంగా కొనియాడారు. 

తన ఇన్‌స్టా స్టోరీలో కంగనా ఈ సినిమా గురించి పోస్ట్ చేస్తూ.. ‘సీతారామంలో నటీనటులందరూ అద్భుతంగా నటించారు. అయితే, నాకు మృణాల్‌ నటన ప్రత్యేకంగా అనిపించింది. తను భావోద్వేగపూరితమైన సన్నివేశాల్లో ఎంతబాగా చేసిందో. తనలా మరెవరూ నటించలేరు. ఆమె నిజంగా రాణి. జిందాబాద్‌ ఠాకూర్‌ సాబ్. ఇక మీ పాలన ప్రారంభమైంది’ అంటూ తన నోట్‌లో ఒక రాణి ఎమోజీని కూడా కంగనా పోస్ట్‌ చేశారు.  హను రాఘవపూడి దర్శకత్వంలో తెరకెక్కిన ఈ సినిమాలో రష్మిక, సుమంత్, గౌతమ్‌ మేనన్‌, ప్రకాష్‌ రాజ్‌ తదితరులు కీలకపాత్రలు పోషించారు. యుద్ధం నేపథ్యంతో రాసిన ఈ ప్రేమకథను తెలుగుతో పాటు, తమిళ, మలయాళ భాషల్లో ఏకకాలంలో విడుదల చేశారు.