Chetan Kumar: వివాదాస్పద ట్వీట్.. కన్నడ నటుడి అరెస్ట్‌

బెంగళూరు: కన్నడ చిత్ర పరిశ్రమకు చెందిన నటుడు చేతన్‌ కుమార్‌ (Kannada Actor Chetan Kumar)ను బెంగళూరు పోలీసులు మంగళవారం అరెస్టు చేశారు. ఓ మతాన్ని కించపరుస్తూ ట్వీట్‌ చేశాడన్న అభియోగాలపై అతడిని అదుపులోకి తీసుకున్న శేషాద్రిపురం పోలీసులు కోర్టులో హాజరుపర్చారు. దీంతో న్యాయస్థానం అతడికి 14 రోజుల జ్యుడీషియల్‌ కస్టడీ విధించింది.

చేతన్‌ (Chetan Kumar) సోమవారం ఓ మతాన్ని కించపరుస్తూ ట్వీట్‌ చేశాడు. అది కాస్తా వైరల్‌ కావడంతో కొందరు తీవ్ర ఆగ్రహం వ్యక్తం చేస్తూ అతడిపై ఫిర్యాదు చేశారు. దీంతో అతడి ట్వీట్‌ రెండు వర్గాల మధ్య ఘర్షణలను రెచ్చగొట్టేలా ఉందన్న అభియోగాలపై పోలీసులు నేడు అతడిని అరెస్టు చేశారు.

కన్నడ నాట చేతన్‌ అహింస (Chetan Ahimsa)గా గుర్తింపు తెచ్చుకున్న అతడు.. పలు సినిమాల్లో నటించి పాపులర్‌ అయ్యాడు. సామాజిక కార్యక్రమాల్లోనూ చురుగ్గా ఉండే చేతన్‌.. దళిత, గిరిజనుల హక్కుల కార్యకర్తగా పనిచేస్తున్నారు. కాగా.. ఈ నటుడు ఇలా వివాదాస్పద వార్తల్లో నిలవడం ఇదే తొలిసారి కాదు. 2022 ఫిబ్రవరిలో హిజాబ్‌ కేసును విచారిస్తున్న కర్ణాటక హైకోర్టు ప్రధాన న్యాయమూర్తి కృష్ణ దీక్షిత్‌పై అభ్యంతరకర ట్వీట్‌ చేసి వివాదాల్లో చిక్కుకున్నాడు. ఆ ట్వీట్‌ చేసినందుకు గానూ అతడిని పోలీసులు అరెస్టు చేయగా.. ఆ తర్వాత బెయిల్‌పై విడుదలయ్యాడు.