Karan Johar: కరణ్‌ జోహార్‌ కీలక ప్రకటన

ముంబయి: బాలీవుడ్‌ నిర్మాత, దర్శకుడు కరణ్‌ జోహార్ కీలక ప్రకటన చేశారు. వ్యాఖ్యాతగా ఆయన్ని ప్రేక్షకులకు ఎంతగానో చేరువ చేసిన ‘కాఫీ విత్‌ కరణ్‌’ షో ముగిసిందని తెలిపారు. ప్రముఖ సెలబ్రిటీ చాట్‌ షోగా పేరు తెచ్చుకున్న ఈ షోలో.. బీటౌన్‌ స్టార్‌ సెలబ్రిటీలను కరణ్‌ ఇంటర్వ్యూలు చేశారు. దాదాపు 6 సీజన్లపాటు ఈ షో విజయవంతంగా కొనసాగింది. కాగా, గత కొన్నిరోజుల నుంచి ‘కాఫీ విత్‌ కరణ్‌ - సీజన్‌ 7’ రానుందంటూ వార్తలు వస్తున్నాయి. ఈ నేపథ్యంలో ఆయా వార్తలపై తాజాగా కరణ్‌ స్పందించారు. ‘‘గడిచిన ఆరు సీజన్ల నుంచి ‘కాఫీ విత్‌ కరణ్‌’ నా, మీ జీవితాల్లో భాగమైపోయింది. ఈ షో వేదికగా మేము ఒక సరికొత్త ప్రభావం కలిగించిందనందుకు ఆనందంగా ఉంది. అలాంటి ‘కాఫీ విత్‌ కరణ్‌’ తిరిగి ప్రసారం కావడం లేదు. బరువైన హృదయంతో ఈ మాట చెబుతున్నా’’ అని కరణ్‌ తెలిపారు.