Karthi: హీరో కార్తి ఫేస్‌బుక్‌ అకౌంట్‌ హ్యాక్‌..

హైదరాబాద్‌: భాషతో సంబంధం లేకుండా అభిమానులను సంపాదించుకున్నాడు కార్తి (karthi). వైవిధ్యభరితమైన కథలను ఎంచుకుంటూ తన ప్రత్యేకతను చాటుకుంటుంటాడు. తన సినిమాలకు సంబంధించిన అప్‌డేట్‌లైనా.. తన వ్యక్తిగత విషయాలైనా సోషల్‌మీడియా వేదికగా అభిమానులతో పంచుకుంటుంటాడు ఈ యంగ్‌ హీరో. తరచూ నెట్టింట యాక్టివ్‌గా ఉండే కార్తి ఫేస్‌బుక్‌ పేజీ హ్యాక్‌ అయిందిట. ఈ విషయాన్ని అతడే ట్విటర్‌ వేదికగా తెలియజేశాడు. ‘‘నా ఫేస్‌బుక్‌ పేజీ హ్యాక్‌ అయింది. ప్రస్తుతం ఫేస్‌బుక్‌ టెక్నికల్‌ టీంతో కలిసి పనిచేస్తున్నాం. త్వరలోనే అకౌంట్‌ను తిరిగి పొందేందుకు ప్రయత్నిస్తాం’’ అని ట్వీట్‌ చేశాడు.

ఇక ఈ ఏడాది కార్తి వరస విజయాలతో దూసుకెళ్తున్నాడు. పొన్నియిన్‌ సెల్వన్‌ సినిమాతో అలరించిన ఈ హీరో సర్దార్‌తో భారీ విజయాన్ని అందుకున్నాడు. ఇందులో కార్తి నటనకు సినీ విమర్శకులు కూడా ప్రశంసలు కురిపించారు. ప్రస్తుతం ఈ హీరో రాజు మురుగన్‌ దర్శకత్వంలో జపాన్‌ (Japan) సినిమాలో నటిస్తున్నాడు. ఈ చిత్రంలో అతడి సరసన అను ఇమ్మాన్యుయేల్‌ అలరించనుంది.  డ్రీమ్‌ వారియర్‌ పిక్చర్స్‌ పతాకంపై ఎస్‌.ఆర్‌.ప్రకాష్‌బాబు, ఎస్‌.ఆర్‌.ప్రభు నిర్మిస్తున్నారు. సునీల్‌ ఓ కీలకపాత్రలో కనిపించనున్నాడు.