Karthi: ఆ అనుభూతిని వర్ణించడానికి మాటలు రావడం లేదు : కార్తి

చెన్నై: ప్రముఖ దర్శకుడు మణిరత్నం రూపొందించిన ‘పొన్నియిన్‌ సెల్వన్‌’ అంతటా మంచి టాక్‌ సొంతం చేసుకోవడంపై నటుడు కార్తి స్పందించారు. ఇలాంటి చరిత్రాత్మక చిత్రంలో భాగమైనందుకు ఆనందంగా ఉందన్నారు.

‘‘వందియ‌దేవ‌న్‌గా ఈ ప్రయాణంలో నేను పొందిన అనుభూతిని వర్ణించడానికి మాటలు సరిపోవడం లేదు. కల్కి కృష్ణమూర్తి రాసిన అద్భుతమైన నవలను  పూర్తిగా అర్థం చేసుకొని.. ఎన్నో ఏళ్ల పాటు శ్రమించి దీన్ని ఒక చిత్రంగా తెరకెక్కించిన దర్శకుడు మణిరత్నానికి, మునుపెన్నడూ చూడని విజువల్స్‌తో ఈ కథను చిత్రీకరించిన రవివర్మన్‌కు, వీనులవిందైన సంగీతం అందించిన రెహమాన్‌కు, ఆనాటి వైభవాన్ని తన సెట్స్‌తో కళ్లకు కట్టినట్లు చూపించిన తోట తరణికి.. ఇలా కెమెరా వెనుక ఉండి సినిమా కోసం వర్క్‌ చేసిన వారితోపాటు, నా తోటి నటీనటులకూ కృతజ్ఞతలు. అలాగే, ఈ చిత్రానికి మంచి విజయాన్ని అందించిన నా అభిమానులకు, సినీ ప్రియులకు ధన్యవాదాలు’’ అని కార్తి పేర్కొన్నారు.

చోళ సామ్రాజ్య వైభవాన్ని తెలియజేస్తూ ఈ చిత్రాన్ని రూపొందించారు. రెండు భాగాలుగా ఇది ప్రేక్షకులను అలరించనుంది. విక్రమ్‌, జయం రవి, ఐశ్వర్యారాయ్‌, త్రిష, కార్తి కీలకపాత్రలు పోషించారు. ఇటీవల ప్రేక్షకుల ముందుకు వచ్చిన ‘పొన్నియిన్‌ సెల్వన్‌’ మొదటి భాగంగా పాజిటివ్‌ టాక్‌ సొంతం చేసుకుంది.