Keerthy Suresh: నిజమా... కాదా?

కీర్తి సురేశ్‌ (Keerthy Suresh) చేతినిండా సినిమాలతో బిజీ బిజీగా గడుపుతోంది. తెలుగులోనే చిరంజీవితో కలిసి ‘భోళాశంకర్‌’, నానితో కలిసి ‘దసరా’ సినిమాల్లో నటిస్తోంది.  తమిళంలోనూ కీలకమైన సినిమాలు చేస్తోంది. ఇంకా ప్రకటించని మరో సినిమాని కూడా చేస్తున్నట్టు ఆమె ఈమధ్యే ఇన్‌స్టాలో పేర్కొంది. నటిగా ఆమె జోరు ఇలా సాగుతుంటే... మరోవైపు కొత్త ప్రయాణం దిశగా అడుగులు వేస్తోందంటూ సరికొత్త ప్రచారం ఊపందుకుంది. చిత్ర నిర్మాణంలోకి అడుగు పెడుతోందన్నదే ఆ ప్రచారం. కథానాయికగా ఇన్ని సినిమాలు చేస్తున్న కీర్తి ఇప్పుడు కొత్త అడుగులు వేసే సాహసం చేస్తుందా అనేదే  ప్రశ్న. ఆమె సన్నిహితులు మాత్రం నిర్మాణానికి సంబంధించిన ప్రణాళికలేవీ లేవంటున్నారు. కానీ కీర్తి మాత్రం కథల కోసం అన్వేషణ సాగిస్తున్నట్టు తెలుస్తోంది. నిర్మాణం ఆమెకి కొత్తేమీ కాదు. కీర్తి తండ్రి సురేశ్‌ కుమార్‌ మలయాళంలో పలు చిత్రాలు నిర్మించారు. మరి భవిష్యత్తులో తండ్రి అడుగు జాడల్లో నడుస్తూ నిర్మాణంలోనూ ఓ చేయి వేస్తారేమో చూడాలి.