KGF Chapter 2: హిందీలోనూ అదరగొడుతున్న కేజీయఫ్‌2

ఇంటర్నెట్‌డెస్క్‌: ప్రస్తుతం సినిమా కబుర్లు చెప్పుకొనే ఏ ఇద్దరి నోట విన్నా ‘కేజీయఫ్‌2’(KGF Chapter 2) సంగతులే. రాఖీభాయ్‌గా యశ్(Yash) నటన, ప్రశాంత్‌ నీల్‌ టేకింగ్‌ సినిమాను మరో స్థాయిలో నిలబెట్టాయి. పాన్‌ ఇండియా సినిమాగా విడుదలైన ‘కేజీయఫ్2’ బాలీవుడ్‌లోనూ రికార్డులు తిరగరాస్తోంది. దేశవ్యాప్తంగా విడుదలైన రెండో రోజే ఈ సినిమా రూ.240 కోట్ల గ్రాస్‌ను కలెక్ట్‌ చేసింది. ఒక్క హిందీలోనే రూ.100కోట్ల మార్కును దాటినట్లు ట్రేడ్‌ వర్గాలు అంచనా వేస్తున్నాయి. వరుస సెలవులు రావటం, ‘ఆర్‌ఆర్‌ఆర్‌’ ఫీవర్‌ తగ్గడం ఈ సినిమాకు బాగా కలిసొచ్చింది. ఇక ఈ శని, ఆది వారాల్లో మరింత స్థాయి వసూళ్లు వచ్చే అవకాశం ఉంది.  రాఖీభాయ్‌ ఈ జోరు కొనసాగిస్తే, ఈ వీకెండ్‌తో రూ.500 కోట్ల క్లబ్‌లో చేరటం ఖాయంగా కనిపిస్తోంది. మరి ఇటీవల రూ.1000కోట్ల కలెక్షన్లతో రికార్డు సాధించిన ‘ఆర్‌ఆర్‌ఆర్‌’ను అధిగమిస్తుందా? లేదో చూడాలి.