KGF Chapter 2: కేజీయఫ్‌-2 నుంచి బిగ్‌ అప్‌డేట్‌

ట్రైలర్‌ విడుదల ఆరోజే!

ఇంటర్నెట్ డెస్క్‌: దేశవ్యాప్తంగా సినీ అభిమానులు ఆసక్తిగా ఎదురుచూస్తున్న పాన్‌ఇండియా చిత్రం ‘కేజీయఫ్‌-2’. యశ్‌ కథానాయకుడిగా ప్రశాంత్ నీల్‌ దర్శకత్వంలో తెరకెక్కిన యాక్షన్‌ థ్రిల్లర్‌ ‘కేజీయఫ్‌’. ఈ చిత్రానికి కొనసాగింపుగా ‘కేజీయఫ్‌2’ ప్రేక్షకుల ముందుకు రానున్న సంగతి తెలిసిందే. తాజాగా ఈ చిత్రానికి సంబంధించి ఓ అప్‌డేట్‌ ఇచ్చింది చిత్రబృందం. ‘‘మార్చి27 సాయంత్రం 6.40 గంటలకు ట్రైలర్‌ విడుదల కానుంది’’ అంటూ చిత్ర బృందం ట్వీట్‌ చేసింది. ప్రపంచవ్యాప్తంగా ఏప్రిల్‌ 14న ఈ చిత్రం థియేటర్లలో విడుదల కానుంది.  తెలుగు, కన్నడ, తమిళం, మలయాళం, హిందీతో పాటు ఇంగ్లీష్‌లోనూ ఈ సినిమాను విడుదల చేయనున్నారు. శ్రీనిధి శెట్టి, సంజయ్ దత్, రవీనా టాండన్, రావు రమేష్, ప్రకాష్ రాజ్‌ తదితరులు కీలక పాత్రలు పోషిస్తున్నారు. విజయ్‌ కిరంగదూర్ నిర్మిస్తోన్న ఈ చిత్రానికి రవి బస్రూర్‌ సంగీతం అందిస్తున్నారు.