KGF: అరుదైన రికార్డు సృష్టించిన టీజ‌ర్‌

ఇంట‌ర్నెట్ డెస్క్‌: యావ‌త్ సినీ ప్రియులు ఎంతో ఆస‌క్తిగా ఎదురు చూస్తోన్న చిత్రం ‘కేజీయఫ్ ఛాప్ట‌ర్ 2’. పాన్ ఇండియా స్థాయిలో యశ్ క‌థానాయ‌కుడిగా ప్ర‌శాంత్ నీల్ తెర‌కెక్కిస్తున్నారు. య‌శ్ పుట్టిన రోజు సంద‌ర్భంగా జ‌న‌వ‌రి 7న విడుద‌లైన ఈ సినిమా టీజ‌ర్ స‌రికొత్త రికార్డు సృష్టించింది. అతి త‌క్కువ రోజుల్లోనే అత్య‌ధిక కామెంట్లు (యూ ట్యూబ్‌లో) పొందిన తొలి క‌న్న‌డ టీజ‌ర్‌గా నిలిచింది. 10 ల‌క్షల మంది ఈ టీజ‌ర్‌పై కామెంట్ చేశారు. 188 మిలియ‌న్స్‌కి పైగా వీక్ష‌ణ‌లు, 8 మిలియ‌న్స్‌కిపైగా లైక్స్ సొంతం చేసుకుంది. ట్విట‌ర్ వేదిక‌గా ఈ విష‌యాన్ని తెలియ‌జేసింది నిర్మాణ సంస్థ హోంబ‌లే ఫిల్మ్స్‌. య‌శ్‌- ప్ర‌శాంత్ కాంబినేష‌న్‌లో గ‌తంలో వ‌చ్చిన ‘కేజీయఫ్ ఛాప్ట‌ర్ 1’ అఖండ విజయం అందుకోవ‌డంతో ఈ సీక్వెల్ పై భారీ అంచనాలు నెలకొన్నాయి. ఈ చిత్రంలో య‌శ్ స‌ర‌స‌న శ్రీనిధి శెట్టి న‌టిస్తోంది. ర‌వీనా టాండ‌న్‌, సంజ‌య్ ద‌త్‌, రావు ర‌మేశ్ కీల‌క పాత్ర‌లు పోషిస్తున్నారు. ర‌వి బ‌ర్సూర్ సంగీతం అందిస్తున్నారు.