Kiran Abbavaram: విభిన్న టైటిల్‌తో విచ్చేసిన కిరణ్‌ అబ్బవరం

ఇంటర్నెట్‌ డెస్క్‌: యువ నటుడు కిరణ్‌ అబ్బవరం హీరోగా కార్తీక్‌ శంకర్‌ ఓ చిత్రాన్ని తెరకెక్కిస్తున్నారు. ఇటీవల లాంఛనంగా ప్రారంభమైన ఈ సినిమా టైటిల్‌ను చిత్ర బృందం తాజాగా ప్రకటించింది. టైటిల్‌లోగోతో కూడిన కిరణ్‌ ఫస్ట్‌లుక్‌ను సోషల్‌ మీడియా వేదికగా విడుదల చేసింది. ఈ చిత్రానికి ‘నేను మీకు బాగా కావాల్సినవాడిని’ అనే పేరు ఖరారైంది. కిరణ్‌ నటిస్తున్న 5వ చిత్రమిది. సంజన ఆనంద్‌ కథానాయిక. మణిశర్మ స్వరాలు సమకూరుస్తున్నారు. ప్రముఖ దర్శకుడు దివంగత కోడి రామకృష్ణ కుమార్తె దివ్య దీప్తి ఈ సినిమాతో నిర్మాతగా మారారు. ఈ కుటుంబ కథా చిత్రానికి ఛాయాగ్రాహకుడు: రాజ్‌ కె. నల్లి, సాహిత్యం: భాస్కరభట్ల. ‘రాజావారు రాణిగారు’, ‘ఎస్‌. ఆర్‌. కల్యాణమండపం’ చిత్రాలతో యువతను అమితంగా ఆకట్టుకున్న కిరణ్‌ ‘సెబాస్టియన్‌’ సినిమాతో త్వరలోనే అలరించనున్నారు. ఆయన నటించిన ‘సమ్మతమే’ అనే  ప్రేమ కథా చిత్రం విడుదలకు సిద్ధమవుతోంది. ‘వినరో భాగ్యము విష్ణుకథ’ అనే చిత్రం ఇటీవల ప్రారంభమైంది.