Kiran Abbavaram: కిరణ్‌ అబ్బవరం కొత్త సినిమా ప్రారంభం

హైదరాబాద్‌: ‘రాజా వారు రాణీ గారు’ తో (Raja Vaaru Rani Gaaru) కథానాయకుడిగా తెరంగేట్రం చేసి మొదటి ప్రయత్నంలోనే సక్సెస్‌ సొంతం చేసుకున్నారు యువ హీరో కిరణ్‌ అబ్బవరం (Kiran Abbavaram). గతేడాది ఆయన నటించిన ‘ఎస్‌. ఆర్‌. కళ్యాణమండపం’ (SR Kalyanamadapam) విడుదలై ప్రేక్షకాదరణ పొందింది. ఈ స్పీడ్‌లోనే ఆయన మరో కొత్త సినిమా ఓకే చేశారు. జీఏ-2 పిక్చర్స్‌ పతాకంపై మురళీ కిషోర్‌ అబ్బూరి దర్శకత్వంలో ఓ ప్రాజెక్ట్‌కు ఆయన పచ్చజెండా ఊపారు. అల్లు అరవింద్‌ సమర్పణలో బన్నీ వాసు నిర్మాతగా వ్యవహరించనున్నారు. తాజాగా ఈ సినిమా పూజా కార్యక్రమం శుక్రవారం ఉదయం జరిగింది. ఈ విషయాన్ని తెలియజేస్తూ సినిమా టైటిల్‌ని చిత్రబృందం విడుదల చేసింది. ఈ చిత్రానికి ‘వినరో భాగ్యము విష్ణుకథ’ (VinaroBhagyamuVishnuKatha) అనే పేరు ఖరారు చేశారు. యూత్‌ఫుల్‌ ఎంటర్‌టైనర్‌గా తెరకెక్కనున్న ఈ సినిమాలో కిరణ్‌ విభిన్నంగా కనిపించనున్నారు. చిత్రానికి సంబంధించిన పూర్తి వివరాలు తెలియాల్సి ఉంది.