AP News: సినిమా వాళ్లకు ఏపీ గుర్తుందా?: ఎమ్మెల్యే ప్రసన్నకుమార్‌

నెల్లూరు: సినిమా వాళ్లకు ఆంధ్రప్రదేశ్‌ అసలు గుర్తుందా? అని నెల్లూరు జిల్లా కోవూరు ఎమ్మెల్యే ప్రసన్నకుమార్‌రెడ్డి(Prasanna Kumar Reddy) అన్నారు. ఏపీకి సీఎంగా జగన్‌మోహన్‌రెడ్డి ఉన్నారని హీరోలు, దర్శకులు, నిర్మాతలు అనుకుంటున్నారా? అని ప్రశ్నించారు. ఎంతసేపటికీ హైదరాబాద్‌లో ఉంటూ తెలంగాణలో సినిమాలు తీసుకుంటూ ఏపీ గురించి ఏనాడైనా ఆలోచించారా? అని నిలదీశారు. బుచ్చిరెడ్డిపాలెం నగర పంచాయతీలో పలు అభివృద్ధి కార్యక్రమాలకు శంకుస్థాపన చేసిన ప్రసన్నకుమార్‌ మాట్లాడారు. సినిమా టికెట్ల ధరలు తగ్గిస్తే తప్పేంటి? అని ప్రశ్నించారు. సామాన్యుడు కూడా పెద్ద సినిమాలు చూడాలనే వైకాపా ప్రభుత్వం ధర తగ్గింపు నిర్ణయం తీసుకుందని ప్రసన్నకుమార్‌ చెప్పారు. సినిమా వాళ్లకు తెదేపా అధినేత చంద్రబాబు మద్దతు ఉందని ఆయన ఆరోపించారు.