Krishna Vamsi: ఆ సినిమా ఫ్లాప్‌.. సీక్వెల్‌ ఎలా చేస్తా: కృష్ణవంశీ

హైదరాబాద్‌: ‘డేంజర్‌’ (Danger) వంటి క్రైమ్‌, సస్పెన్స్‌ థ్రిల్లర్‌తో ఒకానొక పరాజయాన్ని అందుకున్నారు దర్శకుడు కృష్ణవంశీ (Krishna Vamsi). నరేశ్‌, స్వాతి, సాయిరామ్‌ శంకర్‌ ప్రధాన తారాగణంగా రూపుదిద్దుకున్న ఈ సినిమా ప్రేక్షకుల ఆదరణ అందుకోలేకపోయింది. ‘డేంజర్‌’ విడుదలై సుమారు 17 ఏళ్లు అవుతోన్న నేపథ్యంలో ఈ సినిమా సీక్వెల్‌పై కృష్ణ వంశీ స్పందించారు.

‘డేంజర్‌’కు స్వీకెల్‌ తెరకెక్కించవచ్చు కదా..! అంటూ ఓ నెటిజన్ ట్వీట్‌ చేయగా.. ‘‘ఈ సినిమా ఫ్లాప్‌ సర్‌. నా ఉద్దేశం ప్రకారం ప్రేక్షకులు దాన్ని అంగీకరించలేదు. అలాంటప్పుడు ఆ చిత్రానికి కొనసాగింపు ఎలా చేయగలను’’ అని కృష్ణవంశీ సమాధానమిచ్చారు. మరో నెటిజన్‌.. ‘మీ ఉద్దేశంలో ఫ్లాప్‌ అంటే ఏమిటో నాకు తెలియదు. కానీ, ఆ సినిమా మా మనుసు దోచుకుంది’ అని ట్వీట్‌ చేశాడు. ‘‘సినిమాపై పెట్టిన డబ్బును కూడా నిర్మాత తిరిగి పొందలేకపోతే దాన్నే ఫ్లాప్‌ అంటారు. డబ్బే రాజ్యం ఏలుతున్న ఈరోజుల్లో ఇలాంటి సినిమాపై పెట్టుబడి పెట్టడానికి ఏ నిర్మాత కూడా ముందుకురాడు’’ అని ఆయన బదులిచ్చారు. ప్రస్తుతం కృష్ణవంశీ ‘రంగమార్తాండ’ తెరకెక్కిస్తున్నారు. బ్రహ్మానందం, ప్రకాశ్‌రాజ్‌, రమ్యకృష్ణ ..తదితరులు నటిస్తున్నారు.