Krishna Vrinda Vihari: టీజర్‌తో.. ‘కృష్ణ వ్రింద విహారి’

నాగశౌర్య కథానాయకుడిగా అనిష్‌ ఆర్‌ కృష్ణ తెరకెక్కిస్తున్న చిత్రం ‘కృష్ణ వ్రింద విహారి’. ఉషా మూల్పూరి నిర్మాత. షిర్లే సెతియా కథానాయిక. ఈ సినిమా ఏప్రిల్‌ 22న ప్రేక్షకుల ముందుకు రానుంది. ఈ నేపథ్యంలోనే ప్రచార కార్యక్రమాల్ని వేగవంతం చేస్తోంది చిత్ర బృందం. ఇందులో భాగంగా ఈనెల 28న టీజర్‌ విడుదల చేయనున్నారు. ఈ విషయాన్ని చిత్ర బృందం శనివారం అధికారికంగా ప్రకటించింది. ఈ మేరకు సామాజిక మాధ్యమాల వేదికగా కొత్త పోస్టర్‌ను విడుదల చేసింది. ఆ ప్రచార చిత్రంలో శౌర్య, షిర్లే రొమాంటిక్‌ లుక్‌లో కనిపించారు. ‘‘కొత్తదనం నిండిన కథాంశంతో రూపొందుతోన్న చిత్రమిది. ఇందులో శౌర్య బ్రాహ్మణుడిగా కనిపించనున్నారు. నిర్మాణాంతర కార్యక్రమాలు శరవేగంగా జరుగుతున్నాయి’’ అని చిత్ర బృందం తెలిపింది. మహతి స్వర సాగర్‌ స్వరాలందిస్తున్నారు. సాయి శ్రీరామ్‌ ఛాయాగ్రాహకుడిగా వ్యవహరిస్తున్నారు.