న‌ట‌న‌కు 7 ఏళ్లు.. చేతిలో 7 చిత్రాలు 

ముంబ‌యి: అందం, అభిన‌యంతో ‘హీరోపంటి’ చిత్రంతో హిందీ ప్రేక్ష‌కుల్ని, ‘1 నేనొక్క‌డినే’ సినిమాతో తెలుగు ప్రేక్ష‌కుల్ని తొలి ప‌రిచ‌యంలోనే మెప్పించింది కృతి స‌న‌న్‌. టైగ‌ర్ ష్రాఫ్ స‌ర‌స‌న‌ ఆమె న‌టించిన ‘హీరోపంటి’ విడుద‌లై నేటితో ఏడు వ‌సంతాలు పూర్త‌య్యాయి. ఈ సంద‌ర్భంగా త‌న కెరీర్ గురించి మాట్లాడింది కృతి. ‘ఓ న‌టిగా బ‌ల‌మైన పాత్ర‌ల్ని పోషించాల‌నుకుంటున్నాను. ఇప్ప‌టి వ‌ర‌కు క‌నిపించని కొత్త పాత్ర‌ల్ని ఎంపిక చేసుకునే దిశ‌గా సాగుతున్నాను. అదృష్ట‌వ‌శాత్తూ నా ఏడేళ్ల ప్ర‌యాణంలో విభిన్న క‌థా చిత్రాల్నే చేశాను. అన్ని వ‌ర్గాల ప్రేక్ష‌కుల్ని అల‌రించేందుకు విభిన్న పాత్ర‌లు ఎంపిక చేసుకోవ‌డం స‌వాలుతో కూడిన ప‌ని. అయినా అందులో సంతృప్తి దొరుకుతుంది. అలాంటి పాత్ర‌ల‌కు న్యాయం చేయ‌గ‌ల‌న‌ని ఆశిస్తున్నాను’ అని తెలిపింది.

ప్ర‌స్తుతం కృతి చేతిలో ఏడు భారీ ప్రాజెక్టులు ఉన్నాయి. ప్ర‌భాస్ హీరోగా  తెరకెక్కుతోన్న పాన్ ఇండియా చిత్రం ‘ఆదిపురుష్‌’, హిందీ సినిమాలు గ‌ణ‌ప‌త్‌, భెడియా, మిమీ, బ‌చ‌ప‌న్ పాండే, హ‌మ్ దో హ‌మారే దో, టైటిల్ ఖ‌రారు చేయ‌ని మ‌రో సినిమాతో బిజీగా ఉంది ఈ భామ‌.