Adipurush: ‘ఆదిపురుష్‌’లో నటిస్తోన్నందుకు చాలా గర్వంగా ఉంది: కృతి సనన్‌

హైదరాబాద్‌: పాన్‌ ఇండియా స్టార్‌ ప్రభాస్‌ (Prabhas) నటిస్తున్న ‘ఆదిపురుష్‌’ (Adipurush) కోసం సినీ ప్రియులు ఎంతగానో ఎదురుచూస్తున్నారు. ఓం రౌత్‌ దర్శకత్వంలో అత్యున్నత సాంకేతికతతో ఈ సినిమా తెరకెక్కుతోంది. ఈ చిత్రంలో ప్రభాస్‌ సరసన కృతి సనన్‌(Kriti Sanon) నటిస్తోన్న విషయం తెలిసిందే. తాజాగా ‘ఆదిపురుష్‌’ గురించి మాట్లాడిన కృతి.. ఇలాంటి సినిమాలో నటిస్తున్నందుకు చాలా గర్వంగా ఉందని తెలిపింది. ప్రేక్షకులు కూడా ఈ సినిమా చూశాక అలానే అనుకుంటారని చెప్పింది.

ఇక ఈ సినిమాలో సీత పాత్ర తనకెంతో నచ్చిందని కృతి సనన్‌(Kriti Sanon) పేర్కొంది. ‘ఆదిపురుష్‌’ కేవలం సినిమా మాత్రమే కాదని ఒక విజువల్‌ వండర్‌ అని తెలిపింది. ఇలాంటి సినిమాలు పిల్లలకూ ఎంతో నచ్చుతాయని చెప్పింది. రామానంద్‌ సాగర్‌ రామాయణాన్ని చూడలేదని పేర్కొన్న కృతి.. ఆదిపురుష్‌ సినిమా చూశాక పిల్లల్లో రామాయణంపై అవగాహన పెరుగుతుందని తెలిపింది.  అత్యంత భారీ బడ్జెట్‌తో రానున్న ఈ సినిమాలో రాముడి పాత్రలో ప్రభాస్‌, సీతగా కృతి సనన్‌, రావణాసురుడిగా సైఫ్‌ అలీఖాన్‌ నటించారు. ఈ సినిమా టీజర్‌కు కొన్ని విమర్శలు ఎదురవ్వడంతో మరోసారి వీఎఫ్‌ఎక్స్‌ పనులపై చిత్రబృందం దృష్టి సారిస్తోంది.

ఇటీవలే ‘భేడియా’(Bhediya) చిత్రంలో కనిపించిన ఈ బ్యూటీ కార్తీక్‌ ఆర్యన్‌కు జోడీగా ‘షెహ్‌జాదా’(Shehzada) చిత్రంతో అలరించనుంది. ఇది తెలుగులో బ్లాక్‌బస్టర్‌గా నిలిచిన ‘అలవైకుంఠపురములో..’కి రీమేక్‌గా తెరకెక్కుతోంది. రోహిత్‌ ధావన్‌(Rohit Dhawan) దర్శకత్వం వహించిన ఈ ఫ్యామిలీ ఎంటర్‌టైనర్‌ని అల్లు అరవింద్‌, భూషణ్‌ కుమార్‌, అమన్‌గిల్‌ నిర్మించారు. అటు ప్రభాస్‌ కూడా చేతి నిండా సినిమాలతో బిజీగా ఉన్నాడు.