Kriti Sanon: పాత్ర లోతెంతో చూస్తా

కృతి సనన్‌ (Kriti Sanon) కథానాయికగా నటించిన ‘భేడియా’ ఈమధ్యే విడుదలైన సంగతి తెలిసిందే. ఇందులో డాక్టర్‌ అనికా పాత్రతో వైవిధ్యమైన, గుర్తుండిపోయే నటన ప్రదర్శించిందని విమర్శకులతో సహా అంతా ఆమెను ప్రశంసిస్తున్నారు. ఈ సంతోషాన్ని ఆదివారం సామాజిక మాధ్యమాల ద్వారా పంచుకుంది కృతి. ఈ సందర్భంగా ‘భేడియా’ (Bhediya) చిత్ర షూటింగ్‌ వీడియోని జత చేసింది. ఇందులో ‘ఒక్కోసారి సినిమాలో నా పాత్ర నిడివి ఎంత ఉంది. చివరిదాకా కనిపిస్తానా? లేదా? అని ఆలోచించను. దాని లోతు, ప్రాముఖ్యం ఏంటో మాత్రమే ఆలోచిస్తాను. డాక్టర్‌ అనికా పాత్ర సైతం అలాంటి క్లిష్టమైన, నటనకు అవకాశం ఉన్నదే. అనికా ఏ ప్రశ్నకు సమాధానం చెప్పదుగానీ.. మీరు మాత్రం నాకు అన్ని సమాధానాలు చెప్పారు’ అంటూ దర్శకుడు అమర్‌కౌశిక్‌ని ఉద్దేశించి చెప్పుకొచ్చింది. కథానాయకుడు వరుణ్‌ ధావన్‌ సైతం ఈ వీడియోలో కృతి నటనని పొగడ్తల్లో ముంచెత్తాడు.  కృతి పాత్ర సినిమా పెద్ద ఎసెట్‌ అని మెచ్చుకున్నాడు. ఆమె నటించిన ‘గణపత్‌’, ‘షెహ్‌జాదా’ సినిమాలు ప్రస్తుతం నిర్మాణానంతర కార్యక్రమాల్లో ఉన్నాయి.