Kriti Sanon: ఆ హీరోతో సినిమాపై క్లారిటీ ఇచ్చిన కృతి సనన్‌

హైదరాబాద్‌: తన అందంతో అందరినీ ఆకట్టుకుంటుంది కృతి సనన్‌ (Kriti Sanon). టాలీవుడ్‌లోనే కాకుండా బాలీవుడ్‌లోనూ వరస ఆఫర్లు అందుకుంటోంది. గ్లామర్‌ పాత్రలతో పాటు కుటుంబ కథాచిత్రాల్లోనూ నటిస్తూ అన్ని వర్గాల ప్రేక్షకుల అభిమానాన్ని పొందుతోంది. కొన్నిరోజుల నుంచి ఈ అమ్మడు  గురించి ఓ వార్త నెట్టింట వైరల్‌ అవుతోంది. షాహిద్‌ కపూర్‌(Shahid Kapoor)తో  కృతి సనన్‌ ఆడిపాడనుందని అనుకుంటున్నారు బీ టౌన్‌ ప్రేక్షకులు.

తాజాగా ఈ విషయంపై కృతి సనన్‌ క్లారిటీ ఇచ్చింది. తాను షాహిద్‌ కపూర్‌తో కలిసి నటించనున్నట్లు తెలిపింది. త్వరలోనే దీనికి సంబంధించిన పూర్తి వివరాలు అధికారికంగా వెల్లడిస్తానని చెప్పింది. ఇక ప్రస్తుతం ఈ బ్యూటీ కార్తీక్‌ ఆర్యన్‌కు జోడీగా ‘షెహ్‌జాదా’(Shehzada) చిత్రంలో నటిస్తోంది. ఇది తెలుగులో బ్లాక్‌బస్టర్‌గా నిలిచిన ‘అలవైకుంఠపురములో..’కి రీమేక్‌గా తెరకెక్కుతోంది. రోహిత్‌ ధావన్‌ దర్శకత్వం వహించిన ఈ ఫ్యామిలీ ఎంటర్‌టైనర్‌ని అల్లు అరవింద్‌, భూషణ్‌ కుమార్‌, అమన్‌గిల్‌ నిర్మించారు. త్వరలోనే ఈ చిత్రం ప్రేక్షకుల ముందుకు రానుంది. దీనితో పాటు ప్రభాస్‌ సరసన ‘ఆదిపురుష్‌’ (Adipurush)లో నటిస్తోంది కృతి. రామాయణం ఆధారంగా అత్యున్నత సాంకేతికతతో రూపొందుతోన్న చిత్రమిది. ఓం రౌత్‌ దర్శకత్వం వహిస్తోన్న ఈ సినిమాలో సైఫ్‌ అలీఖాన్‌, సన్నీసింగ్‌ కీలక పాత్రలు పోషిస్తున్నారు.