Kriti Sanon: ‘ఆదిపురుష్‌’ దాన్ని నేనస్సలు ఊహించలేదు.. ఎంతో బాధపడ్డా: కృతిసనన్‌

ముంబయి: పాన్‌ ఇండియా స్టార్‌ ప్రభాస్ (Prabhas)‌, నటి కృతిసనన్ ‌(Kriti Sanon) జంటగా నటించిన చిత్రం ‘ఆదిపురుష్‌’ (Adipurush). రామాయణాన్ని ఆధారంగా చేసుకుని దీన్ని తెరకెక్కించారు. విజయదశమి పురస్కరించుకుని గతేడాది ఈ సినిమా టీజర్‌ను విడుదల చేయగా.. దేశవ్యాప్తంగా ఉన్న పలువురు సినీ ప్రియుల నుంచి నిరసనలు వెల్లువెత్తాయి. దీనిపై తాజాగా నటి కృతిసనన్‌ స్పందించారు.

తమ సినిమా టీజర్‌కు ఇలాంటి నెగెటివ్‌ రెస్పాన్స్‌ను తాను అస్సలు ఊహించలేదని తెలిపారు. ‘‘మా సినిమా టీజర్‌కు ప్రేక్షకుల నుంచి ఈ విధమైన స్పందన వస్తోందని నేను అనుకోలేదు. నెగెటివ్‌ కామెంట్స్‌ విని ఎంతో బాధపడ్డా. ప్రేక్షకుల నుంచి వచ్చిన విమర్శలను చిత్రబృందం విని.. అందుకు అనుగుణంగా మార్పులు చేస్తోంది’’ అని ఆమె వివరించారు.

భారీ బడ్జెట్‌తో ఓంరౌత్ దీన్ని తెరకెక్కించారు. ఇందులో ప్రభాస్‌.. రాముడిగా, కృతిసనన్‌.. సీత పాత్రలో నటించారు. రావణాసురుడి పాత్రను సైఫ్‌ అలీఖాన్‌ పోషించారు. ప్రేక్షకుల కోరిక మేరకు గతేడాది ఈ సినిమా టీజర్‌ను విడుదల చేయగా.. పలువురు నెటిజన్లు ఆగ్రహం వ్యక్తం చేశారు. ప్రభాస్‌, కృతిసనన్‌ లుక్స్‌ బాలేవని, సైఫ్‌ అలీఖాన్‌ ధరించిన వస్త్రాలు, ఆయన లుక్స్‌ను తప్పుబట్టారు. గ్రాఫిక్స్‌ కూడా సరిగ్గా చేయలేదని వ్యాఖ్యలు చేశారు.