Kriti Sanon: ప్రభాస్‌తో ప్రేమాయణం వార్తలు.. వరుణ్‌ వ్యాఖ్యలతో బాధపడ్డా: కృతిసనన్‌

ముంబయి: పాన్‌ఇండియా స్టార్‌ ప్రభాస్‌(Prabhas)తో తాను ప్రేమలో ఉన్నానంటూ గతంలో నటుడు వరుణ్‌ధావన్‌ (Varun Dhawan) చేసిన వ్యాఖ్యలపై తాజాగా కృతిసనన్‌ (Kriti Sanon) స్పందించింది. రియాల్టీ షో వేదికగా వరుణ్‌ అన్న మాటలు తనని ఎంతగానో బాధించాయని ఆమె తెలిపింది. తాజాగా ఓ ఇంటర్వ్యూలో పాల్గొన్న ఆమె.. ‘‘ప్రభాస్‌తో నేను ప్రేమలో ఉన్నానంటూ వరుణ్‌ పరోక్షంగా చేసిన వ్యాఖ్యలు నన్ను ఎంతో ఇబ్బందిపెట్టాయి. ఆ క్షణం ఏం చేయాలో అర్థం కాలేదు. ప్రభాస్‌తో ఫోన్‌లో మాట్లాడినప్పుడు ఇదే విషయాన్ని ఆయనతో చెప్పాను. ఆయన వెంటనే.. ‘వరుణ్‌ ఎందుకు అలా చెప్పాడు?’ అని ప్రశ్నించాడు. ‘ఏమో నాక్కూడా తెలియదు. వరుణ్‌ పిచ్చితనంతో అలా చెప్పాడు’ అని బదులిచ్చాను’’ అని వివరించింది.

‘‘నేను పరిశ్రమలోకి అడుగుపెడతాను అన్నప్పుడు అందరూ కాస్త షాక్‌ అయ్యారు. పరిశ్రమ అంటేనే ఒక వింత ప్రపంచమని, ఇక్కడ ఎక్కువగా నెగటివిటీ ఉంటుందని చెప్పారు. ఇక్కడ నెట్టుకు రావడం కష్టమని, సురక్షితం కాదని, ఒక్కసారి నటి అయితే ఆ అమ్మాయికి పెళ్లి కావడం కూడా కష్టమేనని చెప్పారు. పెళ్లి విషయంలో వాళ్ల మాటలు విని నవ్వుకున్నాను. అలాగే నా వయసులో ఉన్నవాళ్లూ ఇలాగే ఆలోచిస్తుంటారా? అని భయపడ్డాను’’ అంటూ (Kriti Sanon) పేర్కొంది.

‘ఆదిపురుష్‌’ (Adi Purush) రిలీజ్‌ కోసం కృతిసనన్‌  (Kriti Sanon) ఆసక్తిగా ఎదురుచూస్తున్నారు. ప్రభాస్‌ (Prabhas) రాముడిగా నటించిన ఈ సినిమాలో కృతి.. సీత పాత్ర పోషించారు. ఈ సినిమా టీజర్‌ విడుదలైన నాటి నుంచి వీరిద్దరూ ప్రేమలో ఉన్నారంటూ ప్రచారం జరుగుతోంది. ఇదిలా ఉండగా గతేడాది తాను నటించిన ‘బేడియా’ ప్రమోషన్స్‌లో భాగంగా సహనటుడు వరుణ్‌ ధావన్‌తో కలిసి ఆమె ఓ రియాల్టీ షోలో పాల్గొన్నారు. ఆ కార్యక్రమంలో కృతి రిలేషన్‌షిప్‌ స్టేటస్‌ గురించి వరుణ్‌ మాట్లాడుతూ..‘‘కృతి పేరును ఓ వ్యక్తి తన గుండెల్లో పెట్టుకున్నారు. ప్రస్తుతం తను ముంబయిలో లేడు. దీపికా పదుకొణెతో కలిసి షూట్‌లో ఉన్నాడు’’ అంటూ ప్రభాస్‌ గురించి పరోక్షంగా వ్యాఖ్యలు చేశాడు. ఈ వ్యాఖ్యలు వైరల్‌గా మారడంతో అవన్నీ అవాస్తవాలు మాత్రమేనని, ప్రభాస్‌ తనకు స్నేహితుడేనంటూ కృతి వివరణ ఇచ్చింది.