Adipurush: ‘ఆదిపురుష్‌’.. వాళ్లు కచ్చితంగా చూడాల్సిన చిత్రం: కృతి సనన్‌

ఇంటర్నెట్‌ డెస్క్‌: స్టార్‌ హీరో ప్రభాస్‌ (Prabhas) రాముడి పాత్రలో నటిస్తోన్న భారీ ప్రాజెక్ట్‌ ‘ఆదిపురుష్‌’ (Adipurush). ఓం రౌత్‌ దర్శకత్వంలో తెరకెక్కుతోన్న ఈ సినిమాలో సీతగా కృతి సనన్‌ (Kriti Sanon) కనిపించనుంది. ఇప్పటికే విడుదలైన ట్రైలర్‌తో సినిమాపై భారీ స్థాయిలో అంచనాలు ఏర్పడ్డాయి. తాజాగా ఐఫా అవార్డ్స్‌లో పాల్గొన్న కృతి ఈ చిత్రంపై ఆసక్తికర కామెంట్స్‌ చేసింది. 

‘‘ఆదిపురుష్‌’ ఎంతో ప్రత్యేకమైన సినిమా. ఇంత గొప్ప సినిమాలో భాగమైనందుకు చాలా ఆనందంగా ఉంది. ఇది నాకు దక్కిన గౌరవంగా భావిస్తున్నాను. అన్ని తరాల వాళ్లు.. ముఖ్యంగా పిల్లలు ఈ చిత్రాన్ని కచ్చితంగా చూడాలి. మన చిన్నతనంలో రామాయణం, మహా భారతాల్లోని కథలు మన అమ్మ, అమ్మమ్మలు చెబుతుంటే విన్నాం. వాటిని సినిమాగా చూస్తే పిల్లలపై మరింత ఎక్కువ ప్రభావం ఉంటుంది. ఈ విజువల్‌ వండర్‌ త్రీడీలో అలరిస్తుంది. కాబట్టి వాళ్లంతా కొత్త అనుభూతిని పొందుతారు. పిల్లలతో పాటు నేటి యువతకు కూడా ఈ చిత్రం కనెక్ట్‌ అవుతుంది. ఆదిపురుష్‌ ట్రైలర్‌కు వచ్చిన స్పందన చూసి మేమంతా ఆశ్చర్యపోయాం. ప్రస్తుతం సోషల్‌ మీడియాలో ‘జై శ్రీరామ్‌’ పాట మారుమోగుతోంది. నేను ఈ సినిమాలోని రెండో పాట కోసం ఎదురుచూస్తున్నాను. అది నాకెంతో ఇష్టమైన పాట. ప్రేక్షకుల హృదయాలను హత్తుకుంటుంది’’ అని కృతి సనన్‌ చెప్పింది.

ప్రస్తుతం ప్రభాస్‌ (Prabhas) అభిమానులతో పాటు సినీ ప్రియులంతా ‘ఆదిపురుష్‌’ (Adipurush) కోసం ఆసక్తిగా ఎదురుచూస్తున్నారు. జూన్ 16న ఈ సినిమా ప్రేక్షకుల ముందుకు రానుంది. ఈ నేపథ్యంలో చిత్రబృందం ప్రమోషన్స్‌ కూడా ప్రారంభించింది. జూన్‌ 6న ఈ సినిమా ప్రీ రిలీజ్ ఈవెంట్‌ తిరుపతిలో గ్రాండ్‌గా నిర్వహించనున్నారు.