Sita Ramam: ‘సీతారామం’ సీక్వెల్‌పై ప్రశ్న.. నిర్మాత సమాధానమేంటంటే?

హైదరాబాద్‌: ‘సీతారామం’ (Sita Ramam) సినిమా సీక్వెల్‌ గురించి ఓ విలేకరి ప్రశ్నించగా నిర్మాత స్వప్న దత్‌ (Swapna Dutt) స్పందించారు. ఆ విషయం దర్శకుడిని అడిగి తెలుసుకోవాలన్నారు. ఆమె నిర్మించిన తాజా వెబ్‌సిరీస్‌ ‘కుమారి శ్రీమతి’ (Kumari Srimathi). నిత్య మేనన్‌ (Nithya Menen), టీవీ యాక్టర్‌ నిరుపమ్‌ (Nirupam Paritala) ప్రధాన పాత్రల్లో రూపొందిన ఈ సిరీస్‌ ఓటీటీ ‘అమెజాన్‌ ప్రైమ్‌ వీడియో’ (Amazon Prime Video)లో ఈ నెల 28 నుంచి స్ట్రీమింగ్‌ కానుంది. ఈ సందర్భంగా హైదరాబాద్‌లో నిర్వహించిన ప్రెస్‌మీట్‌లో ఈ సిరీస్‌ టీమ్‌ పాల్గొంది. డైరెక్టర్లు హను రాఘవపూడి, నందిని రెడ్డి అతిథులుగా హాజరయ్యారు. ప్రెస్‌మీట్‌కు సంబంధించిన సంగతులివీ..

* వైజయంతీ మూవీస్‌ స్ట్రాటజీ మీతో మారిపోయింది. కారణమేంటి?

స్వప్న: ఎలాంటి స్ట్రాటజీ లేకుండా పనిచేసేది మేం మాత్రమే అనుకుంటున్నా. నచ్చిన కథలను ప్రేక్షకులకు చెప్పాలనుకుంటామంతే. చిన్నా, పెద్దా అనే తేడాలు చూడం.

* ఈ సిరీస్‌ కోసం నిత్యకు ముందు మరో హీరోయిన్‌ను అనుకున్నారా?

స్వప్న: ఈ టైటిల్‌ పాత్ర పలు వేరియేషన్స్‌తో కూడుకున్నది. దాన్ని ప్లే చేయడం కొంచెం కష్టమే. నిత్య మేనన్‌ న్యాయం చేయగలదనుకుని ముందుగా ఆమెను సంప్రదించాం. ఆమెకు స్క్రిప్టు నచ్చడంతో గ్రీన్‌ సిగ్నల్‌ ఇచ్చారు.

* ఈ కథను సినిమాగా తీయకుండా సిరీస్‌కు పరిమితం చేశారెందుకు?

స్వప్న: ఓటీటీ రావడం సినిమాలకు ఇబ్బంది అని చాలా అంటుంటారు. కానీ, ఓటీటీ రావడం మంచిదే అని నా అభిప్రాయం. ఇలాంటి కథలో ఓ సినిమా నిర్మించి, దానికి మంచి ఓపెనింగ్స్‌ వచ్చేందుకు కష్టపడి, మౌత్‌ టాక్‌ వచ్చేంత వరకు వేచి చూడడం కంటే ఓటీటీ ద్వారా చూపించడం బెటర్‌ కదా.

* సీరియల్‌ హీరో అయిన నిరుపమ్‌తో కలిసి నటించేందుకు నిత్య మేనన్‌ను ఎలా ఒప్పించారు?

స్వప్న: నిత్య మేనన్‌ గ్రేట్‌ యాక్టర్‌. వర్ధమాన నటులతోనూ కలిసి నటించానుకుంటారు. మేం ఎలాంటి సినిమాలు నిర్మిస్తున్నా మా అమ్మ పట్టించుకోదుగానీ నిరుపమ్‌ సీరియల్‌ టీవీలో వస్తుందంటే చాలు ఆసక్తిగా చూస్తుంది. ఆయన్ను ఈ సిరీస్‌లోకి తీసుకోవడమే మా అమ్మకు నేనిచ్చే బహుమతి.

* వైజయంతీ మూవీస్‌ బ్యానర్‌లో తెరకెక్కే ప్రతి సినిమాలో మీకు ఓ పాత్ర ఉంటుంది. దాని గురించి ఏమంటారు?

రంగస్థలం మహేశ్‌: నా జీవితంలో నేను ఎక్కువగా స్వప్న అక్కకు రుణపడి ఉన్నా. ఆమె నిర్మించిన ప్రతి సినిమాలో నాకు అవకాశం కల్పించారు. కానీ, ప్రభాస్‌ ‘ప్రాజెక్ట్‌ కె’ కోసం తీసుకోలేదు. దాని గురించి మీరే ఆమెను అడగండి (నవ్వుతూ..)

* చాలాకాలం తర్వాత నటించారు. ఈ సిరీస్‌లో మిమ్మల్ని ప్రేరేపించిన అంశం ఏంటి?

రామేశ్వరి: సౌమ్య అనే అమ్మాయి నాకు ఓ రోజు ఫోన్‌ చేసి ‘మేం వెబ్‌సిరీస్‌ ఒకటి చేస్తున్నాం. అందులోని ఓ పాత్ర మీరు చేస్తే బాగుంటుందని అనుకుంటున్నాం’ అని అన్నారు. షూటింగ్‌ ఎక్కడ చేస్తున్నారని మాత్రమే నేను అడిగా. గోదావరి ప్రాంతాల్లో అని ఆమె సమాధానమిచ్చారు. వెంటనే ఓకే చెప్పా.

* ఈ సిరీస్‌ అవకాశం ఎలా వచ్చింది?

నిరుపమ్‌: టీవీ సీరియల్స్‌ నుంచి బయటకువచ్చి సినిమానో, సిరీసో చేయాలనుకున్న సమయంలో స్వప్న ‘కుమారి శ్రీమతి’ గురించి చెప్పారు. ఇందులో హీరోయిన్‌ నిత్యమేనన్‌ నటిస్తున్నారనగానే చాలా సంతోషించా. రామేశ్వరి, గౌతమిలాంటి స్టార్‌ నటీమణలు ఈ సిరీస్‌లో నటిస్తున్నారనే సంగతి సెట్స్‌లో అడుగుపెట్టే వరకు నాకు తెలియదు.

* ‘సీతారామం’ సీక్వెల్‌ ఉంటుందనే రూమర్స్‌ వస్తున్నాయి. మీ స్పందనేంటి?

స్వప్న: కొన్ని సినిమాలు క్లాసిక్స్‌గా నిలిచిపోతాయి. అలాంటి వాటిల్లో ‘సీతారామం’ ఒకటి. సీక్వెల్‌ గురించి నా మనసులో ఏం లేదు. దర్శకుడు హను రాఘవపూడి ఏమనుకుంటున్నారో అడిగి తెలుసుకోండి.

* ‘ప్రాజెక్ట్‌ కె’ రిలీజ్‌ ఎప్పుడు?

స్వప్న: బై సర్‌ (నవ్వుతూ).