Laksh Chadalavada: అలాంటి పాత్రలే నా లక్ష్యం

‘‘రాజమౌళి సినిమాల్లో విలన్‌.. శ్రీను వైట్ల చిత్రాల్లో హీరో.. ఇద్దరూ కలిసి ఓ సినిమా చేస్తే ఎలా ఉంటుందో ‘గ్యాంగ్‌స్టర్‌ గంగరాజు’లో(Gangster Gangaraju) నా పాత్ర అలా ఉంటుంది. చిన్న పిల్లల నుంచి పెద్దవాళ్ల వరకు అందరికీ నచ్చే చిత్రమిది’’ అన్నారు లక్ష్ చదలవాడ(Laksh Chadalavada). ఆయన హీరోగా నటించిన ఈ చిత్రాన్ని ఇషాన్‌ సూర్య తెరకెక్కించారు. చదలవాడ శ్రీనివాసరావు నిర్మించారు. ఈ సినిమా శుక్రవారం విడుదలవుతోంది. ఈ నేపథ్యంలోనే గురువారం హైదరాబాద్‌లో విలేకర్లతో చిత్ర విశేషాలు పంచుకున్నారు హీరో లక్ష్.
* ‘‘నేను గతంలో ఓ నాలుగు సినిమాలు చేశా. తర్వాత కొన్నేళ్లు గ్యాప్‌ తీసుకొని లాక్‌డౌన్‌కు ముందు ‘వలయం’ (Valayam) అనే సినిమా చేశా. ఆ వెంటనే ఈ చిత్రం పట్టాలెక్కించా. అయితే కొవిడ్‌ పరిస్థితుల వల్ల ఈ సినిమా మేమనుకున్న దానికన్నా కాస్త ఆలస్యమైంది. అందుకే మళ్లీ గ్యాప్‌ వచ్చినట్లయింది’’.
*‘‘ఇదొక చక్కటి కమర్షియల్‌ ఎంటర్‌టైనర్‌. కుటుంబంతో కలిసి చూడగలిగేలా ఉంటుంది. ఈ కథ మొత్తం దేవరలంక అనే ఓ ఫిక్షనల్‌ టౌన్‌లో జరుగుతుంటుంది’’.
*‘‘నా గత చిత్రాల్లో వయసుకు మించిన పాత్రలు.. మరీ మాస్‌ పాత్రలు చేశా. ఇకపై నాకంటూ ఓ గుర్తింపు తెచ్చే పాత్రలే చేయాలని లక్ష్యం పెట్టుకున్నా. నన్ను నేను కొత్తగా చూపించేందుకు కఠిన కసరత్తులు చేసి, 25కేజీలు బరువు తగ్గా.  ప్రస్తుతం ‘ధీర’ (Dheera) అనే సినిమా చేస్తున్నా. అదొక రోడ్‌ జర్నీ సినిమా’’.