Naga Chaitanya: చైతూ కోసం ఓ కథ

‘విరాటపర్వం’ (Virataparvam) సినిమాతో హృదయాల్ని కదిలించారు దర్శకుడు వేణు ఊడుగుల (Venu Udugula). తొలి సినిమా నుంచే కథ, కథనాలపై తనదైన ముద్ర వేస్తున్న దర్శకుడాయన. తదుపరి సినిమా కోసం సన్నాహాలు జోరుగా సాగుతున్నాయి. నాగచైతన్య (Naga Chaitanya) కోసం ఓ కథని సిద్ధం చేసి వినిపించినట్టు తెలిసింది. ఇద్దరి మధ్య కథా చర్చలు జరుగుతున్నట్టు ఫిలిం నగర్‌ వర్గాలు చెబుతున్నాయి. నాగచైతన్య ప్రస్తుతం వెంకట్‌ ప్రభు దర్శకత్వంలో ఓ సినిమా చేస్తున్నారు. పలువురు యువ దర్శకులు ఆయన కోసం కథలు సిద్ధం చేస్తున్నారు. అందులో వేణు ఊడుగుల కథ ఒకటి. అన్నీ కుదిరితే ఈ కలయికలో సినిమా పట్టాలెక్కే అవకాశాలున్నాయి.

ఎవరీ అజయ్‌?

అజయ్‌ కతుర్వార్‌ కథానాయకుడిగా నటిస్తూ... స్వీయ దర్శకత్వంలో తెరకెక్కించిన చిత్రం ‘అజయ్‌గాడు’ (Ajaygadu). భానుశ్రీ, శ్వేత మెహతా కథానాయికలు. చందన కొప్పిశెట్టితో కలిసి అజయ్‌ కుమార్‌ ప్రొడక్షన్స్‌ నిర్మించింది. ఈ సినిమా లుక్‌ని కథానాయకుడు సత్యదేవ్‌ హైదరాబాద్‌లో ఆవిష్కరించారు. ‘‘అజయ్‌ కతుర్వార్‌ ‘విశ్వక్‌’ సినిమాతో మంచి గుర్తింపుని తెచ్చుకున్నాడు. ఆయన విభిన్నమైన కథ, కథనాలతో ఈ సినిమాని తెరకెక్కించాడు. త్వరలోనే టీజర్‌ని కూడా విడుదల చేస్తాం. ఈ కథలో అజయ్‌ ఎవరు? తన లక్ష్యం కోసం ఏం చేశాడనేది కీలకం. త్వరలోనే ఈ సినిమా గురించి మరిన్ని వివరాల్ని వెల్లడిస్తామ’’ని తెలిపాయి సినీ వర్గాలు. ఈ చిత్రానికి సంగీతం: కార్తీక్‌ కొడకండ్ల, మనీజేన, సుమంత్‌బాబు, ప్రతీక్, నేపథ్య సంగీతం: సిద్ధార్థ్‌ శివుని.