Rajamouli: రాజమౌళి- మహేశ్‌ కాంబో.. షూటింగ్‌ అప్‌డేట్‌ వచ్చేసింది!

ఇంటర్నెట్‌ డెస్క్‌: ప్రముఖ దర్శకుడు రాజమౌళి, నటుడు మహేశ్‌ బాబు కాంబినేషన్‌లో ఓ చిత్రం తెరకెక్కబోతుంది. అధికారికంగా ప్రకటించకపోయినా పలు ఇంటర్వ్యూల్లో నిర్మాత కె. ఎల్‌. నారాయణ, రాజమౌళి ఈ విషయాన్ని వెల్లడించిన సంగతి తెలిసిందే. ఈ సమాచారం తెలిసిన క్షణం నుంచే సినీ అభిమానుల్లో అంచనాలు పెరిగాయి. మహేశ్‌ బాబును రాజమౌళి ఎలాంటి పాత్రలో చూపిస్తారు? ఏ నేపథ్యంలో సినిమాను తెరకెక్కిస్తారు? హీరోయిన్‌ ఎవరు? టైటిల్‌ ఏంటి? అనే ఉత్కంఠ అందరిలోనూ నెలకొంది. ఈ క్రమంలో ఎన్నో ఊహాగానాలు వచ్చాయి. వాటిని పక్కన పెడితే, ఈ సినిమాను ఎప్పుడు ప్రారంభించబోతున్నారో రాజమౌళి ఆంగ్ల మీడియాకు తెలిపారు. ‘‘స్టోరీని పక్కాగా సిద్ధం చేసుకునేందుకు, ప్రీ ప్రొడక్షన్‌కు సుమారు 7 నెలల సమయం పడుతుంది. ఈ ఏడాది చివరిలో షూటింగ్‌ ప్రారంభించాలనుకుంటున్నా’’ అని చెప్పారు. రామ్‌చరణ్‌, ఎన్టీఆర్‌లతో రాజమౌళి రూపొందించిన ‘ఆర్‌ఆర్‌ఆర్‌’ ఇటీవల విడుదలై, తెలుగు సినిమా రికార్డులను తిరగరాస్తోంది. 

మహేశ్‌ ప్రస్తుతం.. ‘సర్కారువారి పాట’ చిత్రంతో బిజీగా ఉన్నారు. పరశురామ్‌ దర్శకత్వం వహిస్తున్న ఈ ప్రాజెక్టులో కీర్తి సురేశ్‌ కథానాయిక. మైత్రీ మూవీ మేకర్స్‌, 14 రీల్స్‌ ప్లస్‌, జీఎంబీ ఎంటర్‌టైన్‌మెంట్స్‌ సంస్థలు సంయుక్తంగా నిర్మిస్తున్న ఈ సినిమాకి తమన్‌ సంగీతం అందిస్తున్నారు. ఈ యాక్షన్‌ ఎంటర్‌టైనర్‌లో మహేశ్‌.. ఇప్పటి  వరకూ కనిపించని కొత్త లుక్‌లో అలరించనున్నారు. మరోవైపు, త్రివిక్రమ్‌ దర్శకత్వంలో ఓ చిత్రం చేస్తున్నారు. ‘ఎస్‌ఎస్‌ఎంబీ’ వర్కింగ్‌ టైటిల్‌తో ఇటీవల ప్రారంభమైన ఈ సినిమాలో పూజా హెగ్డే కథానాయిక. ఇవి పూర్తయిన తర్వాత రాజమౌళి చిత్రం మొదలయ్యే అవకాశాలున్నాయి.