vijay Deverakonda: అలెప్పీలో ‘ఖుషి’ ఖుషీగ

విజయ్‌ దేవరకొండ (Vijay Deverakonda), సమంత (Samantha) జంటగా శివ నిర్వాణ తెరకెక్కిస్తున్న ప్రేమకథా చిత్రం ‘ఖుషి’ (Kushi). మైత్రీ మూవీ మేకర్స్‌ సంస్థ నిర్మిస్తోంది. మురళీ శర్మ, జయరాం, సచిన్‌ ఖేడేకర్‌ కీలక పాత్రలు పోషిస్తున్నారు. ఈ సినిమా ఇటీవలే హైదరాబాద్‌లో ఓ కీలక షెడ్యూల్‌ పూర్తి చేసుకున్న సంగతి తెలిసిందే. ఇప్పుడీ చిత్ర కొత్త షెడ్యూల్‌ అలెప్పీలో మొదలైంది. ఈ విషయాన్ని దర్శకుడు శివ సామాజిక మాధ్యమాల ద్వారా తెలియజేశారు. దాదాపు వారం పాటు సాగే ఈ షెడ్యూల్‌లో విజయ్‌, సమంతలపై కీలక సన్నివేశాలు చిత్రీకరించనున్నట్లు తెలిసింది. ‘‘రెండు భిన్నమైన నేపథ్యాలు కలిగిన ఓ జంట మధ్య సాగే ఆహ్లాదకరమైన ప్రేమ కథా చిత్రమిది. కశ్మీర్‌ నేపథ్యంలో ఉంటుంది. ఇందులో విజయ్‌ ఆర్మీ అధికారిగా కనిపించనున్నారు’’ అని చిత్ర వర్గాలు తెలిపాయి. ఈ సినిమా సెప్టెంబర్‌ 1న ప్రేక్షకుల ముందుకు రానుంది. ఈ చిత్రానికి సంగీతం: హిషామ్‌ అబ్దుల్‌ వాహబ్‌, ఛాయాగ్రహణం: జి.మురళి.