NTR 30: పనులు చకచకా

కథానాయకుడు ఎన్టీఆర్‌ (NTR) విహార యాత్రలో ఉన్నారు. ఇటీవలే కుటుంబంతో కలిసి అమెరికాకి బయల్దేరి వెళ్లారు. మరోవైపు ఆయన సూచనల మేరకు ఇక్కడ తదుపరి సినిమాకి సంబంధించిన పూర్వనిర్మాణ పనులు శరవేగంగా సాగుతున్నాయి. ఎన్టీఆర్‌ కథానాయకుడిగా కొరటాల శివ (Koratala Siva) దర్శకత్వంలో చిత్రం రూపొందనున్న సంగతి తెలిసిందే. యువ సుధ ఆర్ట్స్‌ పతాకంపై మిక్కిలినేని సుధాకర్‌ నిర్మించనున్నారు. వచ్చే జనవరి ఆఖరులో కానీ, లేదంటే ఫిబ్రవరిలోకానీ సినిమాని సెట్స్‌పైకి తీసుకెళ్లనున్నట్టు సమాచారం. సంగీత దర్శకుడు అనిరుధ్‌తో ఇప్పటికే సంగీత చర్చలు షురూ అయ్యాయి. ఇటీవల హైదరాబాద్‌లో యువ సుధ ఆర్ట్స్‌ కార్యాలయాన్ని ప్రారంభించారు. నిర్మాతలు దిల్‌రాజు, డి.వి.వి.దానయ్యతోపాటు పలువురు సినీ ప్రముఖులు ప్రారంభోత్సవంలో పాల్గొన్నారు.