Prabhas: ‘సలార్‌’ వస్తుందా?వాయిదానా?: స్పందించిన చిత్రబృందం

హైదరాబాద్‌: ప్రభాస్‌ (Prabhas) హీరోగా ప్రశాంత్‌ నీల్‌ (Prashanth Neel) దర్శకత్వంలో తెరకెక్కుతోన్న సినిమా ‘సలార్‌’ (Salaar). భారీ యాక్షన్‌ సన్నివేశాలతో రూపొందుతోన్న ఈ చిత్రం కోసం రెబల్‌ స్టార్‌ అభిమానులు ఆసక్తిగా ఎదురుచూస్తున్నారు. అయితే ‘సలార్‌’ వాయిదా పడనుందనే ఓ వార్త కొన్ని రోజుల నుంచి నెట్టింట తెగ ప్రచారమవుతోంది. దీంతో కొందరు నెటిజన్లు చిత్రబృందాన్ని ట్యాగ్‌ చేస్తూ విడుదల విషయం పై క్లారిటీ ఇవ్వాలని కోరారు.

ఈ రూమర్స్‌కు చెక్‌ పెడుతూ చిత్రబృందం ట్వీట్‌ చేసింది. ‘ఎలాంటి ఆధారం లేని వార్తలను నమ్మకండి. ‘సలార్‌’ అనుకున్న సమయానికే విడుదలవుతుంది. సెప్టెంబర్‌ 28న ఈ చిత్రం థియేటర్లలో సందడి చేయనుంది. ఎప్పటికీ గుర్తుండిపోయే సినిమాను ఎంజాయ్‌ చేయడానికి సిద్ధంగా ఉండండి’ అని ట్వీట్‌ చేసింది. దీంతో ప్రభాస్‌ ఫ్యాన్స్‌ ఈ విషయాన్ని తెగ రీట్వీట్‌ చేస్తున్నారు. ఇక ‘సలార్‌’ రెండు భాగాలుగా రానుందని గతంలో కన్నడ నటుడు దేవరాజ్‌ ధ్రువీకరించిన విషయం తెలిసిందే. ఈ విషయమై ఆయన ఓ ఇంటర్వ్యూలో స్పందిస్తూ.. ‘నా పాత్రకు ‘సలార్‌’ మొదటి భాగంలో కంటే రెండో భాగంలో అధిక ప్రాధాన్యం లభించింది’ అని చెప్పారు. దీంతో ఈ చిత్రం రెండు భాగాలుగా వస్తుందని తేలిపోయింది.

ప్రస్తుతం ముగింపు దశలో ఉన్న ఈ సినిమాలో ప్రభాస్‌కు జోడిగా శ్రుతిహాసన్‌ నటిస్తోంది. పృథ్వీరాజ్‌ సుకుమారన్‌, జగపతిబాబు తదితరులు కీలక పాత్రలు పోషిస్తున్నారు. భారీ బడ్జెట్‌తో రానున్న ఈ చిత్రాన్ని హోంబలే ఫిల్మ్స్‌ సంస్థ నిర్మిస్తోంది. మరోవైపు ప్రభాస్‌ నటించిన ‘ఆదిపురుష్‌’ (Adipurush) ట్రైలర్‌ మంచి ప్రేక్షకాదరణ పొందుతోంది. ఇక వీటితో పాటు ప్రభాస్‌ ‘ప్రాజెక్ట్‌ కె’(Project K)తో బిజీగా ఉన్నారు.