Prabhas: మర్యాద పురుషోత్తం.. ప్రభు శ్రీరామ్‌

ప్రభాస్‌ రాముడిగా నటిస్తున్న పాన్‌ ఇండియా చిత్రం ‘ఆదిపురుష్‌’. రామాయణ ఇతివృత్తంతో ఓం రౌత్‌ తెరకెక్కిస్తున్నారు. సీతగా కృతి సనన్‌ నటిస్తుండగా.. లంకేశుడి పాత్రను సైఫ్‌ అలీఖాన్‌ పోషిస్తున్నారు. ఆదివారం ప్రభాస్‌ పుట్టినరోజు సందర్భంగా ఈ చిత్రం నుంచి కొత్త లుక్‌ విడుదల చేశారు. అందులో ఆయన రాముడిగా విల్లంబులు చేతబూని.. వానర సైన్యంతో కలిసి యుద్ధానికి బయలుదేరుతున్నట్లుగా కనిపించారు. ఈ పోస్టర్‌ను ప్రభాస్‌ తన ఇన్‌స్టాగ్రామ్‌లో పంచుకుంటూ.. ‘‘మర్యాద పురుషోత్తం ప్రభు శ్రీరామ్‌’’ అని రాశారు. దాదాపు రూ.500కోట్ల భారీ బడ్జెట్‌తో నిర్మితమవుతున్న ఈ త్రీడీ చిత్రం.. వచ్చే ఏడాది జనవరి 12న ప్రేక్షకుల ముందుకు రానుంది.

హీరోలు పుట్టరు.. ఉద్భవిస్తారు!
ప్రభాస్‌ పుట్టినరోజు సందర్భంగా ‘ప్రాజెక్ట్‌ కె’ చిత్ర బృందం ఆదివారం ఓ కొత్త ప్రచార చిత్రాన్ని విడుదల   చేసింది. అందులో ప్రభాస్‌ చేతిని.. ఐరన్‌మ్యాన్‌    తరహాలో ఓ సూపర్‌ హీరో చేయిలా చూపించారు.   ‘‘హీరోలు పుట్టరు.. ఉద్భవిస్తారు’’ అని ఆ పోస్టర్‌పై ఓ వ్యాఖ్యనూ జత చేశారు. వినూత్నమైన సైన్స్‌ ఫిక్షన్‌ కథాంశంతో నాగ్‌ అశ్విన్‌ తెరకెక్కిస్తున్న చిత్రమిది. ఈ సందర్భంగా ‘సలార్‌’ చిత్రబృందం ప్రభాస్‌కి పుట్టినరోజు శుభాకాంక్షలు తెలిపింది.