Tollywood: రజనీకాంత్‌, నాని పూర్తి చేశారు.. బెల్లంకొండ ప్రారంభించారు.. నిఖిల్‌ ‘స్వయంభూ’

ఇంటర్నెట్‌ డెస్క్‌: ఓ వైపు క్లాప్‌ బోర్డు సౌండ్‌, కెమెరా క్లిక్‌లతో.. మరోవైపు కేక్‌ కటింగ్‌లతో టాలీవుడ్‌, కోలీవుడ్‌లో గురువారం సందడి నెలకొంది. ప్రముఖ హీరో రజనీకాంత్‌ (Rajinikanth) తన కొత్త సినిమా చిత్రీకరణ పూర్తి చేశారు. నాని (nani) హీరోగా నటిస్తోన్న సినిమాకి సంబంధించి ఓ షెడ్యూల్‌ పూర్తయింది. బెల్లంకొండ సాయి శ్రీనివాస్‌ (Bellamkonda Sai Sreenivas) కొత్త చిత్రాన్ని ప్రారంభించారు. నిఖిల్‌ (Nikhil Siddhartha) ఓ సినిమా ఖరారు చేశారు. ఇంకెందుకు ఆలస్యం ఆ వివరాలపై ఓ లుక్కేయండి..

జైలర్‌ షూట్‌ కంప్లీట్‌

రజనీకాంత్‌ హీరోగా దర్శకుడు నెల్సన్‌ దిలీప్‌కుమార్‌ ‘జైలర్‌’ (jailor) సినిమా తెరకెక్కిస్తున్న సంగతి తెలిసిందే. ఈ సినిమా చిత్రీకరణ తాజాగా ముగిసింది. ఈ సందర్భంగా చిత్ర బృందం సెట్స్‌లో భారీ కేక్‌ను కట్‌ చేసి, ఆనందం వ్యక్తం చేసింది. సంబంధిత ఫొటోలను సోషల్‌ మీడియా వేదికగా అభిమానులతో పంచుకుంది. ఈ సినిమాలో మోహన్‌లాల్‌, శివ రాజ్‌కుమార్‌ కీలక పాత్రలు పోషించారు. తమన్నా, రమ్యకృష్ణ, సునీల్‌, జాకీ ష్రాఫ్‌, యోగిబాబు తదితరులు ముఖ్య పాత్రల్లో నటించిన ఈ సినిమా ఆగస్టు 10న ప్రేక్షకుల ముందుకు రానుంది.

ముంబయిలో నాని..

నాని, మృణాళ్‌ ఠాకూర్‌ జంటగా నూతన దర్శకుడు శౌర్యువ్‌ ఓ సినిమా తెరకెక్కిస్తున్నారు. #Nani30 వర్కింగ్‌ టైటిల్‌తో రూపొందుతోన్న ఈ సినిమా.. ముంబయిలో ఓ షెడ్యూల్‌ని పూర్తి చేసుకుంది. మరో షెడ్యూల్‌ షూటింగ్‌కి చిత్ర బృందం ప్లాన్‌ చేస్తోంది. తండ్రీ కూతుళ్ల బంధం ప్రధానంగా సాగే ఈ చిత్రం డిసెంబరు 21న విడుదల కానుంది.

నిఖిల్‌.. ‘స్వయంభూ’

తన పుట్టినరోజు సందర్భంగా నిఖిల్‌ మరో పాన్‌ ఇండియా చిత్రాన్ని ప్రకటించారు. ‘స్వయంభూ’ (Swayambhu) అనే పేరు టైటిల్‌గా ఖరారైన ఈ సినిమాకి భరత్‌ కృష్ణమాచారి దర్శకత్వం వహించనున్నారు. ఈ మేరకు విడుదల చేసిన పోస్టర్‌ అందరినీ ఆకట్టుకునేలా ఉంది. త్వరలోనే ఈ సినిమా చిత్రీకరణ ప్రారంభంకానుంది. కొన్ని రోజుల క్రితమే నిఖిల్‌.. ‘ది ఇండియా హౌస్‌’ సినిమాని ప్రకటించిన సంగతి తెలిసిందే. ప్రస్తుతం ఆయన ‘స్పై’ చిత్రంతో బిజీగా ఉన్నారు. జూన్‌ 29న ఈ చిత్రం ప్రేక్షకుల ముందుకు రానుంది.

#BSS10 షురూ..

బెల్లంకొండ సాయి శ్రీనివాస్‌ హీరోగా దర్శకుడు సాగర్‌. కె. చంద్ర ఓ సినిమా తెరకెక్కిస్తున్నారు. పూజా కార్యక్రమాలతో ఆ సినిమా లాంఛనంగా ప్రారంభమైంది. దర్శకులు హరీశ్‌ శంకర్‌, పరశురామ్‌ తదితరులు హాజరై, చిత్ర బృందానికి శుభాకాంక్షలు తెలిపారు. #BSS10 వర్కింగ్‌ టైటిల్‌తో రెగ్యులర్‌ షూటింగ్‌ త్వరలోనే ప్రారంభంకానుంది.