Tollywood: ఒకే రూమ్‌లో.. చిత్రీకరణ

అభిషేక్‌ వర్మ, మనో చిత్ర జంటగా పద్మ మగన్‌ తెరకెక్కించిన చిత్రం ‘రూమ్‌’ (Room). వి.యస్‌.సుబ్బారావు నిర్మాత. బెనర్జీ, సంపత్‌ రామ్‌, తెరి దీన తదితరులు కీలక పాత్రలు పోషించారు. ఈ చిత్ర ఫస్ట్‌లుక్‌ను ఇటీవల హైదరాబాద్‌లో విడుదల చేశారు. ఈ సందర్భంగా దర్శకుడు మాట్లాడుతూ.. ‘‘ఈ సినిమాలో మంచి కథ ఉంది. కాస్త అడల్ట్‌ కంటెంట్‌ ఉన్నా.. అది పరిమితంగానే ఉంటుంది. ఈ చిత్రాన్ని 60శాతం ఒకే రూమ్‌లో షూట్‌ చేశాం. నన్ను నమ్మి నాకీ అవకాశమిచ్చిన నిర్మాతకు ధన్యవాదాలు’’ అన్నారు. ‘‘కడుపుబ్బా నవ్వించే చిత్రమిది. ఇలాంటి మంచి సినిమాలో నటించే అవకాశమిచ్చిన దర్శక నిర్మాతలకు థ్యాంక్స్‌’’ అన్నారు హీరో అభిషేక్‌. కార్యక్రమంలో ప్రసన్న కుమార్‌, బెనర్జీ, రామరాజ్‌, అశ్విన్‌ తదితరులు పాల్గొన్నారు.

స్వేచ్ఛపై చర్చించే చిత్రం

కల్పనా తివారీ ప్రధాన పాత్రలో రామ్‌ అల్లాడి తెరకెక్కిస్తున్న చిత్రం ‘పేజెస్‌’ (Pages). ఏ.ఆర్‌.ఐ.టి. వర్క్స్‌ ఇండియా సంస్థ నిర్మిస్తోంది. పంకజ్‌ మున్షీ, ఆనంద్‌ రంగరాజన్‌, శిల్పా దాస్‌ తదితరులు కీలక పాత్రలు పోషించారు. ఈ చిత్ర టీజర్‌ ఇటీవలే విడుదలైంది. ఈ సందర్భంగా దర్శకుడు రామ్‌ అల్లాడి మాట్లాడుతూ.. ‘‘సామాజిక స్వేచ్ఛకు, వ్యక్తిగత స్వేచ్ఛకు మధ్య ఉన్న వ్యత్యాసం మా చిత్రంలో ప్రధాన అంశం. స్వాతంత్య్రానంతర పరిణామాల వల్ల ప్రభావితమైన ఒక రాజకీయ కుటుంబం నేపథ్యంలో సాగే కథ ఇది. దిల్లీ, బంగ్లాదేశ్‌లోని నవఖాలితో పాటు తెలంగాణలోని కొన్ని ప్రాంతాలతో ముడిపడి ఉంటుంది. ఇది పూర్తిగా కల్పిత కథే. ఇందులో కల్పనాతో పాటు మరో ముగ్గురు మహిళలు ప్రధాన పాత్రలు పోషించారు. ప్రస్తుతం హైదరాబాద్‌, వరంగల్‌లలో చిత్రీకరణ జరుపుతున్నాం’’ అన్నారు. సంగీతం: శ్రీవర్ధన్‌ సాయి, ఛాయాగ్రహణం: కృష్ణ గుంటుపల్లి, రామ్‌ అల్లాడి.