Cinema News: ప్రేమ.. లక్ష్యం.. సంఘర్షణ

రంజిత్‌, సౌమ్య మేనన్‌, గగన్‌ విహారి, రావు రమేష్‌, నరేశ్‌ తదితరులు ప్రధాన పాత్రల్లో నటించిన చిత్రం ‘లెహరాయి’. రామకృష్ణ పరమహంస దర్శకుడు. మద్దిరెడ్డి శ్రీనివాస్‌ నిర్మాత. బెక్కెం వేణుగోపాల్‌ సమర్పిస్తున్నారు. ఈ సినిమా ప్రస్తుతం నిర్మాణాంతర పనుల్లో ఉంది. ఈ చిత్ర మోషన్‌ పోస్టర్‌ను దర్శకుడు విజయ్‌ కుమార్‌ కొండా గురువారం హైదరాబాద్‌లో విడుదల చేశారు. ఈ సందర్భంగా ఆయన మాట్లాడుతూ.. ‘‘సినిమాకి మంచి టైటిల్‌ పెట్టారు దర్శకుడు. జి.కె. చక్కటి మ్యూజిక్‌ ఇచ్చారు. మంచి కథతో సినిమా తీసిన నిర్మాతకు బెక్కెం వేణుగోపాల్‌ సపోర్ట్‌గా నిలవడం చిత్ర యూనిట్‌కు శుభపరిణామం’’ అన్నారు. ‘‘ఇదొక చక్కని ఫ్యామిలీ ఎంటర్‌టైనర్‌. ఈ చిత్రం నాకు నచ్చడంతో.. పర్‌ఫెక్ట్‌గా ప్రేక్షకుల ముందుకు తీసుకొస్తున్నాం’’ అన్నారు నిర్మాత బెక్కెం వేణుగోపాల్‌. దర్శకుడు మాట్లాడుతూ.. ‘‘ఫ్యామిలీ ఎమోషన్స్‌తో మిళితమైన ఫీల్‌ గుడ్‌ లవ్‌ స్టోరీతో ఈ చిత్రం రూపొందించాం. అందరికీ నచ్చుతుంది’’ అన్నారు. ‘‘ఓవైపు ప్రేమ మరో వైపు గోల్‌.. ఈ రెండింటి మధ్య ఉన్న సంఘర్షణను కథానాయిక ఎలా ఎదుర్కొంది అన్నదే ఈ చిత్ర కథాంశం’’ అన్నారు నిర్మాత. ఈ కార్యక్రమంలో జి.కె, టిప్స్‌ సుప్రీం రాజు, రంజిత్‌ తదితరులు పాల్గొన్నారు.