‘లిసా’ తన తల్లికి పెళ్లి చేసిందా..?

ఇంటర్నెట్‌ డెస్క్‌: తన తల్లికి మళ్లీ పెళ్లి చేయాలని భావించిన ఓ యువతి పెద్దల ఆశీర్వాదం తీసుకోవడానికి తన సొంత ఇంటికి వెళుతుంది. ఈ క్రమంలోనే ఆమె తన గతాన్ని తెలుసుకుంటుంది. మరోవైపు దెయ్యం వాళ్లను వెంటాడుతూ ఉంటుంది. ఇంతకీ ఆ దెయ్యం వాళ్లను ఎందుకు వెంటాడుతోంది..? వాళ్ల గతంతో దానికి ఉన్న సంబంధం ఏంటీ..? ఆ యువతి తన తల్లికి పెళ్లి చేయగలిగిందా..? అనే ఆసక్తికరమైన కథాంశంతో తెరకెక్కిన చిత్రం ‘లిసా’. అంజలి ‘లిసా’గా ప్రధానపాత్ర పోషించింది. రాజు విశ్వనాథ్‌, బ్రహ్మానందం, మకరంద్‌ దేశ్‌పాండే, యోగిబాబు, కల్యాణి, సలీమా కీలక పాత్రల్లో నటించారు. ప్రముఖ ఓటీటీ వేదిక ‘ఆహా’లో అందుబాటులో ఉంది. తొలి తెలుగు హార్రర్‌ త్రీడీ చిత్రంగా ఈ సినిమాను రాజు విశ్వనాథ్‌ దర్శకత్వంలో తెరకెక్కించారు. ఎస్‌.కె.పిక్చర్స్‌, వీరూ క్రియేషన్స్‌ పతాకంపై వీరేశ్‌ కాసాని సమర్పణలో నిర్మించారు. సురేశ్‌ కొండేటి నిర్మాత. 2019లో థియేటర్లలో విడుదలైన ఈ చిత్రం తమిళ ప్రేక్షకులను విశేషంగా ఆకట్టుకుంది. ఇప్పుడు తెలుగులోనూ అలరించేందుకు సిద్ధమైంది. తాజాగా ‘ఆహా’ సినిమా తెలుగు ట్రైలర్‌ను ప్రేక్షకులతో పంచుకుంది.