RamaJogaiah Sastry: మీకు ఇబ్బంది ఉంటే ఇటు రాకండి.. రామజోగయ్య శాస్త్రి ట్వీట్‌ వైరల్‌

హైదరాబాద్‌: స్టార్‌ హీరోలకు హిట్‌ పాటలు అందించిన ప్రముఖ సినీ గేయ రచయిత రామ జోగయ్య శాస్త్రి తాజాగా చేసిన ఓ ట్వీట్‌ వైరల్‌గా మారింది. ‘‘ప్రతి పాట ప్రాణం పెట్టి మమకారంతో రాస్తాను. దయచేసి నన్ను గౌరవంగా చూడగలిగిన వారు మాత్రమే నాతో ప్రయాణించండి. జన్మనిచ్చిన అమ్మగారి గౌరవార్థం నా పేరును సరస్వతీ పుత్ర రామజోగయ్యశాస్త్రిగా మార్చుకున్నాను. ఈ విషయంపై వేరే వాళ్లు ఇబ్బంది పడాల్సిన అవసరం లేదు. మీకేమైనా ఇబ్బంది ఉంటే ఇటు రాకండి’’ అని ఆయన రాసుకొచ్చారు.

రామజోగయ్య శాస్త్రి ఉన్నట్టుండి ఈ విధంగా ట్వీట్‌ పెట్టడానికి గల కారణం ఏమిటో తెలియదు. ‘వీర సింహారెడ్డి’ సినిమా కోసం ఆయన రాసిన ‘జై బాలయ్య’ పాట విడుదలైన కొంతసేపటికే ఈ ట్వీట్‌ చేశారు. ఈ పాట విడుదలయ్యాక పలువురు సోషల్‌మీడియా యూజర్స్‌ నెగెటివ్‌గా కామెంట్స్‌ చేశారని.. అందుకే ఆయన ఈ ట్వీట్‌ పెట్టారని కొంతమంది నెటిజన్లు అంటున్నారు. ‘‘జై బాలయ్య’ పాట చాలా బాగుంది. సాహిత్యంపై పట్టులేని వాళ్లు చేసే వ్యాఖ్యలు మీరు పట్టించుకోవాల్సిన అవసరం లేదు’’ అంటూ మరికొంతమంది తమ మద్దతు తెలియజేస్తున్నారు.