Maayon: థ్రిల్‌ చేసే ‘మాయోన్‌’

ప్రముఖ నటుడు సత్యరాజ్‌(Sathyaraj) తనయుడు శిబిరాజ్‌ (Sibi Sathyaraj) కథానాయకుడిగా కిషోర్‌ దర్శకత్వంలో తెరకెక్కిన తమిళ చిత్రం ‘మాయోన్‌’(Maayon). అదే పేరుతో తెలుగులో అనువదిస్తున్నారు నిర్మాత మామిడాల శ్రీనివాస్‌. ఈ నెల 7న విడుదలవుతోంది. ఈ సందర్భంగా ఇటీవల హైదరాబాద్‌లో ముందస్తు విడుదల వేడుకని నిర్వహించారు. రచయిత విజయేంద్రప్రసాద్‌, నటుడు సత్య ప్రకాశ్‌, నిర్మాతలు టి.ప్రసన్నకుమార్‌, తుమ్మలపల్లి రామసత్యనారాయణ, తిరుపతి రెడ్డితోపాటు, రేణుక తదితరులు హాజరయ్యారు. రచయిత విజయేంద్రప్రసాద్‌ మాట్లాడుతూ ‘‘సత్యరాజ్‌కీ నాకూ ఏదో రుణానుబంధం ఉంది. అందుకే నేను రాసిన ‘బాహుబలి’ కథలో కట్టప్పగా ఆయన నటించారు. మైథలాజికల్‌ థ్రిల్లర్‌గా రూపొందిన ‘మాయోన్‌’ కోసం కథానాయకుడు, దర్శకనిర్మాతలు ఎంతో ఇష్టంతో కష్టపడ్డారు.   తప్పకుండా విజయవంతం అవుతుంద’’’న్నారు. ‘‘ఓటీటీలో విడుదల కోసం మంచి ఆఫర్లు వచ్చినా విజువల్‌గా ప్రేక్షకులకు ఓ గొప్ప అనుభూతిని పంచాలని థియేటర్లలో విడుదల చేస్తున్నాం. మైథాలజీ, మిస్టరీల మేళవింపుగా సాగే ఈ సినిమా అందరినీ థ్రిల్‌ చేస్తుంది. ఇలాంటి కథలు అందరికీ చేరువ కావాల’’న్నారు చిత్ర దర్శకుడు. ఈ కార్యక్రమంలో శిబిరాజ్‌, సత్యరాజ్‌ పాల్గొన్నారు.