మాధవన్‌కు కరోనా.. ఫన్నీ ట్వీట్‌

ఇంటర్నెట్‌ డెస్క్‌: కరోనా విజృంభిస్తున్న తరుణంలో సినీ ప్రముఖులు వరుసగా కరోనా బారిన పడుతున్నారు. నిన్న బాలీవుడ్‌ నటుడు ఆమిర్‌ఖాన్‌కు కరోనా సోకిన విషయం తెలిసిందే. తాజాగా.. మరో నటుడు మాధవన్‌ కూడా కరోనాకు గురయ్యారు. అయితే.. అందరిలా కాకుండా ఈ విషయాన్ని మాధవన్‌ కాస్త భిన్నమైన రీతిలో అభిమానులతో పంచుకున్నారు. తాను నటించిన ‘త్రీఇడియట్స్‌’ సినిమాను ప్రస్తావిస్తూ ఒక ఫన్నీ ట్వీట్‌ చేశారు.

2009లో వచ్చిన బాలీవుడ్‌ హిట్‌ చిత్రం ‘త్రీఇడియట్స్‌’ గుర్తుందిగా. రాజ్‌కుమార్‌ హిరాణి తెరకెక్కించిన ఆ సినిమాలో ఆమిర్‌ఖాన్‌, మాధవన్‌ కలిసి నటించారు. రాంచో పాత్రలో ఆమిర్‌ఖాన్‌, ఫర్హాన్‌గా మాధవన్‌ కనిపించారు. ఆ సినిమాలో వాళ్లు చదివే కళాశాల ప్రిన్సిపల్‌ను సరదాగా వైరస్‌ అనే పేరుతో పిలుస్తుంటారు. ఇదంతా ఇలా ఉండగా.. ఆ చిత్రంలో నటించిన ఆమిర్‌ఖాన్‌, మాధవన్‌ ఇద్దరూ 24గంటల వ్యవధిలో కరోనాకు గురయ్యారు. దీంతో మాధవన్‌ కరోనా సోకిన విషయాన్ని ట్విటర్‌లో పంచుకొంటూ ఇలా రాసుకొచ్చారు. ‘‘రాంచోను ఫర్హాన్‌ అనురించాల్సిందే. వైరస్‌ కూడా మనతోనే ఉన్నాడు. కానీ.. ఈ వైరస్‌ కాస్త ప్రమాదకరం. ఏదేమైనా ఆల్‌ ఈజ్‌ వెల్(సినిమాలో ఫేమస్‌ అయిన డైలాగ్‌)‌. ఇందులోకి రాజు(ఆ సినిమాలో మూడో పాత్ర) రాకూడదని కోరుకుందాం. నేను వేగంగా కోలుకుంటున్నాను. మీ అందరి ప్రేమకు ధన్యవాదాలు’ అని మాధవన్‌ పేర్కొన్నాడు. ఆ చిత్రం నుంచి ఒక పోస్టర్‌ను ట్వీట్‌లో పంచుకున్నాడు.