Dhoni: ‘లవ్‌టుడే’ హీరోయిన్‌తో ధోని తొలి సినిమా

హైదరాబాద్‌: టీంఇండియా మాజీ కెప్టెన్‌ ధోని (Dhoni Entertainment) ఓ నిర్మాణ సంస్థను ప్రారంభించి కొత్త బాటలో అడుగు వేశారు. ఈ సంస్థ నిర్మించే తొలి సినిమాలో నటించే తారాగణంపై ఆసక్తి నెలకొంది. తాజాగా ఈ బ్యానర్‌లో వస్తోన్న సినిమా వివరాలు అధికారికంగా ప్రకటించారు. ‘లెట్స్‌ గెట్‌ మ్యారీడ్‌’(LGM) అనే టైటిల్‌ను ఖరారు చేసి దీనికి సంబంధించిన వీడియో విడుదల చేశారు.

తమిళలో మంచి గుర్తింపు ఉన్న నటుడు హరీష్‌ కల్యాణ్‌(Harish Kalyan) ఇందులో హీరో. అతడి సరసన ‘లవ్‌టుడే’తో యూత్‌లో క్రేజ్‌ను సొంతం చేసుకున్న హీరోయిన్‌ ఇవానా(Ivana) నటిస్తోంది. రమేష్‌ తమిళమణి(Ramesh Thamilmani) ఈ సినిమాకు దర్శకుడు. రొమాంటిక్‌ కామెడీ ఎంటర్‌టైనర్‌గా తెరకెక్కుతున్న ఈ చిత్రంలో నదియా కీలకపాత్రలో కనిపిస్తారు. తమిళ చిత్ర పరిశ్రమలోకి రావడం గురించి ధోని భార్య సాక్షి(Sakshi Dhoni) మాట్లాడుతూ..‘‘మంచి కథలతో దేశవ్యాప్తంగా ఉన్న ప్రేక్షకులను అలరించడమే మా నిర్మాణ సంస్థ లక్ష్యం. దానికి తగ్గట్టుగానే ఈ బ్యానర్‌లో సినిమాలు వస్తాయి’’ అన్నారు. ఈ బ్యానర్‌లో సినిమా చేయడం ఆనందంగా ఉందన్నారు దర్శకుడు రమేష్‌.  ‘లెట్స్‌ గెట్‌ మ్యారీడ్‌’(LGM) సినిమా కుటుంబమంతా ఎంజాయ్‌ చేసేలా ఉంటుందని హామీ ఇచ్చారు.