Sarkaru Vaari Paata: మహేశ్‌బాబును ఇలా చూసుండరు.. వేదికపై డ్యాన్స్‌.. వీడియో వైరల్‌

ఇంటర్నెట్‌ డెస్క్‌: ఎంత పెద్ద నటులైనా వేదికలపై చిన్న డైలాగ్‌ చెప్పాలన్నా, డ్యాన్స్‌ చేయాలన్నా ఇబ్బందిగా ఫీలవుతుంటారు. కార్యక్రమ వ్యాఖ్యాత పట్టుబడితేనో, అభిమానులు కోరితేనో తప్పక ప్రదర్శన ఇస్తుంటారు. ఈ విషయంలో ఎంతో స్ట్రిక్ట్‌గా ఉండే మహేశ్‌బాబు(Mahesh babu) ఎవరి బలవంతం లేకుండానే వేదికపై నృత్యం చేయడం ఇప్పుడు అందరినీ ఆకట్టుకుంది. కర్నూలులో ఈ అరుదైన దృశ్యం చోటుచేసుకుంది. ఎలా అంటే.. మహేశ్‌ హీరోగా దర్శకుడు పరశురామ్‌ తెరకెక్కించిన ‘సర్కారు వారి పాట’ సినిమా సక్సెస్‌ మీట్‌ను కర్నూలు ‘యస్‌.టి.బి.టి’ కాలేజ్‌ గ్రౌండ్స్‌లో సోమవారం నిర్వహించారు. ఈ చిత్రంలోని ‘మ మ మహేశ’ పాటకు డ్యాన్సర్లు పెర్ఫామ్‌ చేస్తుండగా సంగీత దర్శకుడు తమన్‌ వెళ్లి కాలు కదిపారు. ఈ ఉత్సాహభరిత వాతావరణాన్ని చూసిన మహేశ్‌ తన సీట్లో కూర్చోలేకపోయారు. తనే స్వయంగా స్టేజ్‌పైకెక్కి స్టెప్పులేశారు. దర్శకుడితో సహా వీఐపీలు అంతా ఆశ్చర్యపోయారు. కేరింతలు, ఈలలు వేయడం అభిమానుల వంతైంది. మరి ఆలస్యమెందుకు మహేశ్‌ హంగామాను మీరూ చూసేయండి..