MaheshBabu: మహేశ్‌ ఫుల్‌ హ్యాపీ.. సూపర్‌ ఫ్యాన్స్‌ అంటూ ట్వీట్‌

హైదరాబాద్‌: సూపర్‌స్టార్‌ మహేశ్‌ బాబు నటించిన సమ్మర్‌ సెన్సేషనల్‌ ‘సర్కారువారి పాట’. పరశురామ్‌ దర్శకత్వం వహించిన ఈ సినిమా మే 12న విడుదలై బాక్సాఫీస్‌ వద్ద మంచి వసూళ్లతో దూసుకెళ్తోంది. మహేశ్‌ క్లాస్‌ లుక్స్‌, మాస్‌ డైలాగ్‌లతో ఈ సినిమా అభిమానులకు కలర్‌ఫుల్‌ ట్రీట్‌గా మారింది. చాలా రోజుల తర్వాత మహేశ్‌ని ఇలాంటి రోల్‌లో చూడటంపై వాళ్లు ఆనందం వ్యక్తం చేస్తున్నారు. మరోవైపు ఈ సినిమా సక్సెస్‌పై మహేశ్‌ ఫుల్‌ హ్యాపీగా ఉన్నారు. సోమవారం కర్నూలులో జరిగిన విజయోత్సవ వేడుకల్లో స్టేజ్‌పై డ్యాన్స్ చేశారు. తాజాగా తన అభిమానుల్ని ఉద్దేశిస్తూ పోస్టులు పెట్టారు.

‘‘సర్కారువారి పాట’ పట్ల చూపిస్తోన్న అభిమానికి ఎంతో సంతోషిస్తున్నా..! బ్లాక్‌ బస్టర్‌ విజయాన్ని అందించిన నా సూపర్‌ ఫ్యాన్స్‌ అందరికీ ధన్యవాదాలు. చిత్ర బృందానికి ముఖ్యంగా ఇలాంటి అద్భుతమైన చిత్రాన్ని అందించిన దర్శకుడు పరశురామ్‌, మాంచి మ్యూజిక్‌ అందించిన తమన్‌కు ధన్యవాదాలు. ఈ సినిమా నాకెప్పటికీ ప్రత్యేకమే’’ అని మహేశ్‌ రాసుకొచ్చారు.