Maheshbabu: అభిమానులకు మహేశ్‌ లేఖ.. జూన్‌ నుంచి షూట్‌

హైదరాబాద్‌: తన అభిమానులను ఉద్దేశించి సూపర్‌స్టార్‌ మహేశ్‌బాబు ఓ లేఖ రాశారు. ‘సర్కారు వారి పాట’ విడుదలను పురస్కరించుకుని ఆయన ఈ లేఖ విడుదల చేశారు. ‘సర్కారు వారి పాట’ చిత్రాన్ని ప్రతి ఒక్కరూ థియేటర్లలోనే చూడాలని కోరారు. ‘‘ప్రియమైన అభిమాన మిత్రులకు, యువ దర్శకుడు పరశురామ్‌ దర్శకత్వం వహించిన ‘సర్కారు వారి పాట’ మే 12న ప్రపంచవ్యాప్తంగా విడుదల కానుంది. ఇప్పటికే విడుదలైన ఈ సినిమా ఆల్బమ్‌ విశేష సంచలనం సృష్టిస్తోంది. ఎన్నో అంచనాలతో విడుదల కానున్న ఈ చిత్రాన్ని ప్రతి ఒక్కరూ థియేటర్లలోనే చూసి మీ స్పందన తెలియజేయగలరు. ఇక, హారికా హాసిని క్రియేషన్స్‌ పతాకంపై త్రివిక్రమ్‌ శ్రీనివాస్‌ దర్శకత్వంలో నా తదుపరి సినిమా రెగ్యులర్‌ షూట్‌ జూన్‌ నుంచి ప్రారంభం కానుంది’’ అని మహేశ్‌ పేర్కొన్నారు. ప్రస్తుతం ఈ లేఖ నెట్టింట వైరల్‌గా మారింది. కమర్షియల్‌  ఎంటర్‌టైనర్‌గా సిద్ధమైన ‘సర్కారు వారి పాట’ చిత్రంలో మహేశ్‌కు జోడీగా నటి కీర్తి సురేశ్‌ సందడి చేయనున్నారు. ఇందులో మహేశ్‌ మరింత యంగ్‌ లుక్‌లో కనిపించనున్నారు. తమన్ స్వరాలు అందించారు.